Metadon è in medicament che vegn duvrà per la terapia da substituziun per persunas dependentas da heroin. En il Grischun sajan circa 280 persunas en tractament cun metadon. En la medischina palliativa vegn metadon duvrà per la terapia da dolurs, surtut tar pazients da cancer encunter ils uschenumnads mals neuropatics.
Situaziun enconuschenta
Che medicaments manchian na saja betg insatge nov. Igl haja ils ultims mais ed onns adina puspè dà situaziuns ch'igl haja dà difficultads da furniziun tar tschertas substanzas. Quai sajan surtut medicaments da dalurs da la famiglia dals opioids, di Christian Camartin, il manader da la Palliative-Care da l'Ospital chantunal a Cuira. Era Margrith Meier, la mainagestiun da l'Ambulatori Neumühle conferma quai.
I dat alternativas
En l'Ospital chantunal hajan ins anc ina reserva da metadon per ils proxims trais mais, perquai na saja la situaziun betg uschè acuta. Tar l'Ambulatori Neumühle hajan ins avunda metadon per las proximas pèr emnas, qua è la situaziun pli tendida. I dettia dentant substanzas alternativas tar il metadon, din Margrith Meier e Christian Camartin. Ins stoppia lura midar sin in'autra substanza.
Privels u consequenzas pussaivlas
Da midar sin in'autra substanza saja pli simpel tar in pazient che prendia il metadon encunter las dolurs che per ina persuna che survegnia il metadon sco substitut. La dosa ch'in pazient da cancer survegnia, saja circa 10 giadas pli pitschna che tar ina terapia da substituziun. Persunas ch'eran dependentas prendian magari gia decennis metadon. Qua saja la midada sin in'auter medicament per part collià cun temas e malsegirezzas. Sch'insatgi saja puspè integrà bain en la societad ed en la famiglia grazia al tractament da metadon, saja il privel grond che la persuna perdia l'equiliber sch'ella stoppia midar il medicament. Il privel d'en il mender cas crudar enavos en la dependenza da drogas saja qua.
Impurtant saja dad infurmar las persunas pertutgadas e dad esser en stretg contact cun ellas. Ils pazients da l'Ambulatori sajan accumpagnads stretgamain, cunquai ch'els vegnian duas giadas il di per lur medicament. Pli grev vegnia per quels e quellas che sajan tar in medi da chasa, là hajan ins betg uschè in stretg contact ed uschè bler sustegn, di Margrith Meier.
