En Surselva e Grischun Central discurran las uffiziantas ed uffiziants da pli che la mesadad dals pèrins ch'hajan spustà lur termin. En Engiadina Bassa èn quai per il mument circ'in terz da las nozzas fin l'october.
Las prescripziuns vegnan da l'Uffizi federal dal stadi civil. En general valan las reglas d'igiena e da distanza usitadas: dus meters distanza, maximalmain tschintg persunas. A la ceremonia pon be sa participar il pèrin, in uffiziant e las perditgas da matrimoni.
Pli curt, pli pauc persunal
Vinavant giavischa l'uffizi federal ch'ils uffiziants tegnan la ceremonia pli curt. Cun quai vegnian las ceremonias dentant er pli pauc persunalas. Quai manegia l'uffizianta en la regiun Alvra, Erika Hanselmann. Er il contact direct, sco da dar il maun e dar ina branclada al pèr manchia. Surtut en in mument uschè emoziunal tutgia quai bunamain tiers. Tenor l'uffizianta da l'Engiadina Bassa, Tina Luzzi, respectian dentant tuts quellas mesiras.
Tut il temp è spezial, uschia ch'er las nozzas ston esser in zic spezialas.
Ils pèrins che maridan uss, acceptian er, che las persunas stettian sin la fotografia in pau pli ferm in ord l'auter.
Proceder da preparaziun gratuit
Sch'ins vul maridar, ston ins er emplenir or plirs documents. Quai custa er insatge, vinavant èn ils documents be trais mais valaivels. Per cas ch'i n'è pervia da la situaziun actuala betg pussaivel da maridar, saja gratuit da far quest proceder ina segunda giada.