Il cusseglier guvernativ Mario Cavigelli sa legria sin ses biro nov, ha el fatg a savair a la ventschida da l'edifizi d'administraziun chantunal «sinergia»:
Jau ves davent da mes plaz direct vi Domat, en la Surselva, il Calanda... ina bellezza survista. Pli impurtanta è dentant la structura da l'edifizi.
18 mais suenter il cumenzament dal bajetg ha il chantun envidà a la ventschida. La construcziun brutta è vegnida terminada la fin da fanadur e l'entschatta da l'onn 2020 quintan ils responsabels, ch'ils novs biros possian vegnir duvrads.
Gronds biros averts
Suenter la construcziun brutta vegnan uss londervi las construcziuns internas. Tenor il chantun vegn il edifizi a porscher spazis per tut las furmas da lavurar - tant per lavurar persul da maniera concentrada sco er per barattar ideas. I vegn a dar gronds biros cun ina structura averta, ils plazs da lavur n'èn pia betg serrads giu in da l'auter cun paraids. Sin mintga auzada vegn i era a dar zonas da sentupada e sin la tschintgavla auzada ina terrassa.
Il pli grond avantatg dals novs biros è la communicaziun, il lavurar communabel ed è ch'ins vesa e sentia in l'auter pli fitg, tras quella structura.
I dat er vuschs pli criticas, ma quai saja normal. Tenor l'architect chantunal procurian midadas adina er per sceptica. Per el saja impurtant ch'ins haja ina colliaziun directa tar ils collavuraturs. L'entschatta saja la communicaziun betg stada buna. En il davos temps ha i dentant dà differents lavuratoris, nua ch'i haja er dà inputs co ch'ils spazis da lavur duajan vesair ora.
RR actualitad 06:20
