Siglir tar il cuntegn

Header

cuntegn

Marsch sur la senda Dretgira administrativa refusa recurs da Strike WEF

I saja stà correct da bandischar il marsch dals adversaris dal WEF il schaner passà sin ina senda da viandar tranter Küblis e Claustra. La Dretgira administrativa dal Grischun ha refusà in recurs da l'organisaziun Strike WEF – sco las gasettas da Somedia rapportan. Quella aveva reclamà perquai ch'il chantun n'aveva betg lubì da manar il marsch sin quest traject sur la via chantunala. Tenor la dretgira n'ha il scumond betg impedì la libertad d'exprimer l'opiniun e da sa radunar. Ils organisaturs dal marsch da protest cunter il WEF pondereschan anc sch'els sa drizzan al Tribunal federal.

La raschun daco ch'il chantun aveva scumandà il marsch sin quest traject saja stà perquai che questa via avess servì sco axa da salvament per ils vitgs en il conturn perquai che la via chantunala è entras il WEF stada fermamain frequentada. Dentant na saja il collectiv dal «Strike WEF» betg stada persvadida da questa argumentaziun ed haja sinaquai inoltrà recurs tar la Dretgira administrativa dal Grischun.

Era proxim marsch dal 2024 saja planisà sin questa senda

Era per l'onn proxim, ils 13 da schaner 2024, ha il collectiv Strike WEF organisà il marsch sin la senda tranter Küblis e Claustra. La dumonda saja inoltrada. Il di suenter veglian las participantas e participants puspè ir sur ina senda fin la staziun Tavau Wolfgang e prender il tren fin Tavau Platz nua ch'ha lieu ils 14 da schaner la Anti-WEF-Demo da la Juso grischuna. Las permissiuns èn dentant anc pendentas.

RTR novitads 10:00

Artitgels legids il pli savens