La Banca Chantunala Grischuna surpiglia 70% da la banca BZ. Fin ussa appartegneva quella dal tut a l'investider renumà Martin Ebner e sia dunna Rosmarie. Cun questa cumpra veglia la banca chantunala rinforzar sia posiziun en las fatschentas d'investiziun ed extender ses know-how, uschia communitgescha la Banca Chantunala Grischuna. I va cunzunt per la savida en connex cun fatschentas che n'èn betg a la bursa. Ina sparta ch'è tenor il CEO da la banca chantunala Daniel Fust fitg interessanta, ma ch'ins na possia e na veglia er betg bajegiar si intern ord atgna forza. En quest senn saja la cumpra da la la banca BZ in grond cletg per els, ha Daniel Fust ditg envers il schurnal regiunal da Radio SRF.
Betg far fatschenta be en il Grischun
Ord vista da l'expert da bancas e professer da la scol'auta da Lucerna Maurice Pedergnana fa questa cumpra senn. I saja part d'ina clera strategia da diversificar las entradas er cun fatschentas d'ordaifer il chantun. Quai è tenor l'expert bun per esser in ferm partenari da finanzas entaifer il chantun, er sche l'economia e las fatschentas Grischunas avessan ina giada da patir u esser en ina crisa. E gist in chantun muntagnard saja numnadamain pli periclità ch'auters sch'i na giaja betg uschè bain cun l'economia.
Davart dal pretsch da cumpra n'è vegnì communitgà nagut. Ebner n'ha er betg tradì, pertge ch'el venda l'ovra da sia vita. Oz è Ebner cunzunt enconuschent pervi da sia societad aviatica Helvetic.
