Siglir tar il cuntegn
cuntegn

Grischun «Martullo-Blocher vegn anc a persvader votants»

Quai manegia Heinz Brand, cusseglier naziunal e president da la PPS grischuna, suenter la retschertga da DemoSCOPE. La retschertga che l’institut ha fatg per RTR mussa che Brand ha il mument in cler avantatg sin Martullo-Blocher.

Legenda: Guardar il video Retschertga: Brand – Dapertut e tar tuts il nr. 1. Durada 02:16 minutas.
Or da Actualitad video dals 19.06.2015.

Heinz Brand, n’è betg surprais dals resultats da la retschertga da RTR. Sco cusseglier naziunal haja el gì ina pli gronda preschientscha en la publicitad e perquai haja el in avantatg envers Magdalena Martullo-Blocher.

Brand è persvas che Martullo-Blocher vegnia anc da persvader votantas e votants ils proxims mais. Ella sezza n’è betg stada cuntanschibla oz, ha dentant laschar drizzar ora ch'ella

na candideschia betg cunter, mabain cun Brand.

Brand – Dapertut e tar tuts il nr. 1

Avess il suveran grischun d’eleger oz il Cussegl naziunal, faschess Heinz Brand dapertut dapli vuschs che Magdalena Martullo-Blocher. Quai mussa ina retschertga che l’institut DemoSCOPE ha fatg per Radiotelevisiun Svizra Rumantscha.

Era en la regiun dal Plaun cun Domat, nua ch'ella dat lavur a ver 1’000 persunas e scolescha da quai da 140 emprendists faschess Brand dapli vuschs il mument. Il pli grond avantatg sin Martullo-Blocher ha Brand en la regiun Grischun dal nord cun il Partenz ed en las valladas dal sid dal Grischun. En Surselva è il resultat tranter Brand e Martullo-Blocher quasi pari, cun in lev avantatg da Brand.

Graficas retscherca Brand u Martullo-Blocher.
Legenda: RTR

Tar la sanestra prest in tabu

Il pli ferm sustegn han Heinz Brand e Magdalena Martullo-Blocher tar l’atgna partida, la Partida populara svizra dal Grischun.

40% dals electurs e da las electuras da la PPS dessan lur vusch ad omadus, 30% be a Brand e 17 % be a Martullo-Blocher.

Tar simpatisants da las partidas dal center cun PLD, PCD, PBD e PVL mussa la retschertga in cler avantatg per Brand.

Tar la sanestra è la differenza anc pli marcanta. Entant che Brand survegn la vusch dad 11% dals simpatisants da la PS e dals verds fa Martullo-Blocher prest naginas vuschs da la sanestra. Tenor Werner Reimann dal institut DemoSCOPE che ha fatg la retschertga è Martullo-Blocher nunelegibla per la sanestra.

Nagin bonus da dunnas

Magdalena Martullo-Blocher na po era betg far quint cun in bonus tar las dunnas. Brand faschess prest il dubel uschè bleras vuschs tar las dunnas sco Martullo-Blocher. Era quest resultat è per Werner Reimann remartgabel.

Brand e betg Martullo-Blocher

Il cusseglier naziunal da la PPS, Heinz Brand, ha uschia in cler avantatg sin la candidata da la PPS grischuna, Magdalena Martullo-Blocher. Da las 1’001 persunas dumandadas dessan 10% lur vusch tant a Brand sco era a Martullo-Blocher. Prest 19% dessan lur vusch be a Heinz Brand e 9% dessan lur vusch be a Magdalena Martullo-Blocher.

Plipart è per midar lescha

I vegn avant che persunas candideschan per in sez en il Cussegl naziunal betg en il chantun nua ch'ellas vivan, mabain en in auter chantun, sco quai ch’igl è il cas il mument tar la candidata da la PPS, Magdalena Martullo-Blocher. Tenor lescha è quai dentant lubì.

Graficas retscherca Brand u Martullo-Blocher.
Legenda: RTR

Sco quai che la retschertga mussa è la plipart dals dumandads persuenter da midar quella lescha. Quels ch’elegian la PPS èn pero persuenter da laschar la lescha uschia sco quai ch’ella è il mument.

La retschertga è vegnida fatga dals 3 fin ils 13 da zercladur tar 1’001 votantas e votants dal entir Grischun.