Per la 59avla giada organisescha la fundaziun «Schweizer Jugend forscht» in’occurrenza naziunala, che onurescha lavurs da matura extraordinarias. Passa 420 lavurs èn vegnidas inoltradas quest onn. Mo las meglras vegnan vinavant e pon vegnir preschentadas a l’ETH davant ina giuria dad experts.
-
Bild 1 von 4. En ses iert a Cuira ha Mario retschertgà passa in onn davart la dumonda sch'ils avieuls èn in bel di abels da cumbatter il chariel senza agid da l'uman. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Per sia lavur è Mario vegnì onurà da la giuria cun il predicat «fitg bun» ch'è dotà cun 1000 francs ed in premi spezial per ir a far perscrutaziuns sin il Jungfraujoch. Bildquelle: RTR.
Diligent sco ses avieuls
Mario Fröhlich ha tschernì in tema che occupa dapi decennis apiculturs: il chariel da varroa. Quel è per ils avieuls dal vest ina smanatscha pli gronda che per lur parents da l'ost. Mario ha vulì respunder la dumonda, sch'ils avieuls èn in bel di abels da cumbatter il chariel senza agid da l'uman.
En ses iert a Cuira ha Mario retschertgà passa in onn davart quest tema. Ses tat, sez apicultur, ha sveglià la fascinaziun per ils insects pitschens. Cun modifitgar in experiment enconuschent che mesira la diligenza d’igiena dad in pievel, ha Mario pudì demussar ch’ils avieuls daventan insacura buns da vegnir maister cun il chariel da varroa, era sche quai dovra anc temp e lavur da selecziun.
Igl è schon fascinant da vesair ch’ils avieuls pon anc bler dapli che mo sgular ora e purtar enavos pollen e nectar. Sur da quests animals pon ins emprender anc fitg bler.
Per sia lavur è Mario vegnì onurà da la giuria cun il predicat «fitg bun» ch'è dotà cun 1000 francs ed in premi spezial per ir a far perscrutaziuns sin il Jungfraujoch. In toc dapli vala però ch’el è part dals megliers scienziads giuvens da «Schweizer Jugend forscht».