Ils davos dus onns saja l’associaziun dad Alzheimer grischuna s'engaschada fitg en Surselva. Quai era cun crear dus posts da consultaziun.
Posts da consultaziun a Mustér ed a Glion
Brigitte Büchel a Glion e Nicole Candinas a Mustér èn las duas expertas per dumondas enturn la malsogna da demenza Alzheimer en Surselva. Las duas dunnas emprovan cun differentas purschidas da sensibilisar per il tema. Dapi l’entschatta dal mais è il Café Zeitlos mintgamai avert l'emprim venderdi dal mais a Mustér, in inscunter per persunas che han demenza.
Quellas occurrenzas sajan impurtantas per normalisar il mintgadi tant per las persunas dementas sco er per lur famiglias. Pli che la mesadad da las persunas cun demenza vegnan tgiradas da lur confamigliars:
Jau admir tut las persunas che tgiran persunas dementas a chasa. Quai è ina lavur da 24 uras al di, set dis ad emna. Ed jau chat quai fitg bel ch'i pussibiliteschan a la glieud da star a chasa uschè ditg sco pussaivel.
Per Nicole Candinas saja impurtant da porscher in lieu per discurrer avertamain da la malsogna. Perquai è la proxima finamira per il futur da crear ina gruppa da discurs en la Surselva.
Christoffel Pfister da Trun – onurà per ses engaschi en la tgira
En connex cun il di d'Alzheimer mundial èn duas persunas vegnidas onuradas per lur engaschi, per lur lavur cun pertutgads sco simbol per tut quels che tgiran persunas dementas en il num da l'associaziun d'Alzheimer grischuna. In dals dus onurads è Christoffel Pfister.
Passa 50 onns viva l'um ensemen cun sia dunna Rita Pfister-Fry a Trun. Dapi passa tschintg onns patescha sia dunna vi da la malsogna d'Alzheimer. Per l'um dad 82 onns n'èsi mai stà in'opziun da bandunar las atgnas quatter paraids. Ensemen cun il servetsch da sanadad Spitex e duas dunnas dal conturn tgira el sia dunna 24 uras a di. Medemamain saja la famiglia in grond agid.
O bleras giadas è quai in pensum da pli che 100%. Jau hai 82 onns e bleras giadas n'èsi betg uschè simpel – tuttina han ins adina insatgi da discurrer. Nus discurrin adina sur dad insatge.
RR actualitad 07:10
