Il med d'instrucziun per emprender a leger ed a scriver en rumantsch grischun vegn actualisà. Quai ha communitgà la regenza. Concret duajan intginas parts dal med «Leger. E co!» ch’exista actualmain en ils differents idioms, er vegnir purschidas en rumantsch grischun. Uschia vul la regenza cumplettar il med d’instrucziun «Passins» che n’è betg pli il pli nov. Quel è vegnì introducì il 2007 per las emprimas classas ch'han duvrà il rumantsch grischun. Dapi lura n'è quel betg pli vegnì actualisà.
Il med «Leger. E co!» datti dapi il 2016 per sutsilvan, puter e vallader, dapi il 2022 era per sursilvan e surmiran e quest onn suonda lura «Leggere. Eccome!», per talian. Ils custs totals per elavurar e producir las parts dal med d’instrucziun per agiuntar a «Passins» muntian a radund 113'000 francs.
Or da l'archiv
