Siglir tar il cuntegn

Header

Auto ist im Schnee auf einem Parkplatz parkiert, der kofferraum ist offen, 2 personen ziehen sich skisachen an.
Legenda: Grischunas e Grischuns van il pli savens cun auto durant il temp liber. Keystone
cuntegn

Media grischuna Mintga di 33 km sin viadi

Radund 1’400 Grischuns e Grischunas èn sa participads a la nova retschertga davart il cumportament da mobilitad da la Confederaziun. Quella è vegnida realisada da l’Uffizi federal da statistica e da l’Uffizi federal per il svilup da territori.

Dumandà è vegnì quants autos che stettian en la garascha, per tge ch'el vegnia duvrà, quants kilometers ch'ins fetschia cun l'auto, velo, tren u schizunt a pe. «Il rapport mussa ch'i vegn fatg en media 33 km a di. La gronda part da quai cun l'auto.» Quai di Walter Peng, il responsabel per quella retschertga tar il chantun, envers il schurnal regiunal da SRF.

L'auto è il med pli popular

Tar radund 80% da las chasadas stat almain in auto sin ina plazza da parcar u en garascha. 64% hajan in velo u in e-bike, ed in zic dapli che la mesadad possedian in abunament per il traffic public. Da quels saja l'abunament da mesa taxa il pli popular. Il motiv principal pertge ch'ins è insumma sin via – saja quai cun l’auto, traffic public, a pe u cun il velo – è il temp liber.

Radund 50% da las activitads dal traffic èn destinadas per il temp liber. Be 20% per la lavur.
Autur: Walter Peng Responsabel per la retschertga tar il chantun

L’auto vegn duvrà dapli per ir a spass cun il chaun, per visitar amis ed amias u per a far sport che per il viadi a la luvrar. La retschertga mussa dentant er che Grischuns e Grischunas na sa differenzieschan betg fitg dal rest da la Svizra, almain quai che pertutga la mobilitad.

audio
Gugent cun auto e gugent durant il temp liber
ord Actualitad dals 02.02.2024. Maletg: Keystone
laschar ir. Durada: 3 minutas 23 Secundas.

Tenor la Confederaziun avess la retschertga stuì vegnir fatga gia l'onn 2020. Pervia dal lockdown da Corona ha lezza dentant decidì da spustar ella per in onn. Er l'onn 2021 n'è betg stà in onn normal. Homeoffice era fitg popular, la glieud era pli pauc da viadi ch'usità. Per quest motiv n'hajan ins er betg cumpareglià quels cun onns precedents, di Walter Peng al schurnal regiunal da SRF.

Avant la pandemia era la distanza sur 40 kilometers per persuna in media, ussa be pli 33km.
Autur: Walter Peng Responsabel per la retschertga tar il chantun

Consequenzas haja quai er gì sin il maletg dal traffic public. La distanza totala che la glieud ha fatg per di cun tren u cun bus saja – pervia da la pandemia – er ida enavos. Blers han evità il traffic public ed han perquai duvrà pli savens l'auto. Intginas cifras sajan perquai d'interpretar cun precauziun, di Walter Peng.

Las datas che vegnan rimnadas mintga tschintg onns vegnian duvradas per dumondas enturn la planisaziun da territori e vegnan er integradas en il model chantunal da traffic.

RTR actualitad 17:00

Artitgels legids il pli savens