Siglir tar il cuntegn

Header

audio
Mediomatix: in med d'instrucziun rumantsch
Or da Actualitad dals 21.01.2022.
laschar ir. Durada: 2 minutas 33 Secundas.
cuntegn

«Mediomatix» L'emprim med d'instrucziun per tut ils idioms

Entaifer sis onns han differentas gruppas da project da la Scol'auta da pedagogia grischuna elavurà il med d'instrucziun rumantsch per la segunda fin la novavla classa – e quai en quatter idioms. Il med en surmiran suonda quest onn.

Il med d'instrucziun «Mediomatix» è vegnì creà da differentas gruppas da lavur – cunzunt da scolastas e scolasts – e cumpiglia en tut 256 cudeschs. 4 cudeschs da lavur per mintga classa, commentaris per las persunas d'instrucziun ed ina grammatica en mintga idiom: sursilvan, sutsilvan, vallader e puter.

Sumegliant ma tuttina different

Ins ha vulì crear in med d'instrucziun ch'è sumegliant en tut ils idioms, ma che tracta tuttina las atgnadads regiunalas ed idiomaticas. Quai saja era stà ina da las grondas sfidas, di il mainaproject Rico Cathomas.

L'usit da Chalandamarz n'avain nus betg tematisà en il cudesch per sursilvan – tar lez faschessi plitost senn da menziunar il Trair schibettas u insatge sumegliant
Autur: Rico Cathomas mainaproject «Mediomatix»
Giun sin in teppi grisch schaian 31 cudeschs da scola en differentas colurs.
Legenda: Ils cudeschs dal med d'instrucziun «Mediomatix» RTR, Carmen Monn

In avantatg da quest med da scola saja era ch'i dettia el sin palpiri, ma era digital. Uschia saja pli simpel da far adattaziuns, di Rico Cathomas. Per che la versiun squitschada saja uschè sumeglianta sco la digitala, squitschia il chantun be ina pitschna quantitad a la giada.

Era per surmiran

Quest onn duai il med d'instrucziun per la segunda primara cumparair per surmiran. Sco Jon Domenic Parolini, il cusseglier guvernativ responsabel per la furmaziun ha ditg, haja il Surmeir pir da curt puspè midà davent il Rumantsch grischun tar l'idiom sco lingua d'alfabetisaziun. Perquai vegn uss era la versiun surmirana dal med d'instrucziun creada pass per pass. Rico Cathomas è segir ch'ins vegnia da far quai pli simpel, damai ch'ins possia profitar da las experientschas ch'ins ha fatg cun tschels idioms. Enfin l'onn 2029 duai il med d'instrucziun «Mediomatix» esser pront en tut ils tschintg idioms.

RTR actualitad 07:00

Artitgels legids il pli savens

Scrollar a sanestra Scrollar a dretga