Tras il ferm vent dal nord ch'ha setgentà il funs e la mancanza da plievgia resta il privel d'incendis en las valladas talianas ed en il Tessin fitg aut. Per il Puschlav, la Bregaglia, il Mesauc e la Val Calanca vala in scumond absolut da far fieu en il liber.
Era en las ulteriuras regiuns grischunas crescha il privel cuntinuadamain. En la Val dal Rain da Cuira, la regiun da Flem e la regiun Tumleastga vala a partir dad immediat in grond privel d’incendis ed en consequenza in scumond general da far fieu.
En ina gronda part da la Surselva, en la Val Müstair regia in privel considerabel d'incendis da guaud e da cultira. Era en las ulteriuras regiuns po il ristg per privel d'incendis crescher – tut tenor aura era temporarmain.
Survistas uffizialas
In mais istoricamain sitg
Il mars da quest onn hai pluvì, respectiv navì be radund 10% da quai ch'è usità, cumpareglià cun la media a lunga vista. Cun quai pudess quest mais esser en tschertas regiuns da la Svizra il pli sitg ed il pli sulegliv da l'istorgia. En il Grischun, la vart dal nord da las alps e parts dal sid hai perfin dau mo 5% da la summa usitada tranter ils onns 1991 e 2020. Quai tenor Stephan Bader da Meteosvizra.
