Siglir tar il cuntegn

Header

audio
Consequenzas 2G+ per concerts da musica e chant
Or da Actualitad dals 21.12.2021.
laschar ir. Durada: 3 minutas 30 Secundas.
cuntegn

Mesiras da corona 2G+ ed ils concerts da Nadal

La regla da 2G+ pretenda che persunas vaccinadas e guaridas fan vitiers anc in test supplementar – quai vala tranter auter era per concerts e provas da chant.

Dapi ch'il Cussegl federal ha decidì la regla da 2G+ han blers chors stritgà lur concerts da Nadal. Dus da quels èn il chor maschadà Samedan ed il chor viril baselgia Falera.

Damai che la gronda part da las commembras ed ils commembers dal chor avess stuì far in test, hajan els decis da betg chantar en baselgia. Quai ha ditg Heidi Casutt-Cathomen, la dirigenta dal chor da Falera. N'era betg fatg in concert pervia da las novas restricziuns ha il chor da Samedan. Tenor la presidenta dal chor, Anita Pfister, sajan pliras persunas extradas dal chor, dapi che la pandemia ha cumenzà.

Concert a Haldenstein

Nua ch'i dat in concert è a Haldenstein. Las 30 chantaduras e chantadurs dal chor maschadà concerteschan mardi saira cun las novas reglas. Be duas fin trais persunas na sajan betg vaccinadas e na possian pervia da quai betg chantar cun. Las bleras commembras e commembers han dentant dacurt survegnì la terza virola, e pon uschia desister dal test supplementar. Quellas e quels che ston far in test n'hajan nagin problem cun quai, uschia la presidenta Marietta Gasser.

Chantar senza mascrina

Il chor che ha chattà ina soluziun pli extraordinaria è il Chor viril baselgia Savognin. El chanta la messa da Nadal cun mascrina. Uschia pon els desister dal test supplementar ed era gist chattar ora sche quai fiss ina metoda per il futur.

Emprovas stattan en las stailas

Suenter ils concerts da Nadal e Silvester fan blers chors pausa fin la fin schaner. Co i va suenter vinavant cun ils exercizis n'è anc betg cler. En cas che la regla da 2G+ vegniss prolungada sur ils 24 da schaner ora, na saja betg segir sche tut las chantaduras e chantadurs fissan pronts da far in test avant mintg'emprova.

RTR actualitad 17:00

Artitgels legids il pli savens