L'Uffizi federal d'ambient ha approvà la construcziun d'in rempar da 425 meters lunghezza per lung dal vitg Sorte en il Mesauc. L'ovra duai proteger en l'avegnir l'aclaun cunter bovas.
Custs e concepziun
Ils custs muntan a set milliuns francs, ussa sto la radunanza communala approvar il credit. Il rempar vala tenor la vischnanca da Lostallo sco la meglra soluziun da set variantas examinadas.
En cas d'eveniments extrems duai el sviar sistematicamain glera ed aua en la Moesa, entant che l'aual da Molera cula sut cundiziuns normalas vinavant en il nord da Sorte. Uschia duai l'entir territori pertutgà vegnir protegì d'auas grondas e da bovas.
Sche la radunanza communala deliberescha il credit da planisaziun, pudessan las lavurs da construcziun cumenzar tranter la stad e l'atun 2026, ha declerà il president communal Nicola Giudicetti a Keystone-SDA.
Malaura cun consequenzas mortalas
Il zercladur 2024 aveva ina malaura destruì parts dal vitg da Sorte e sutterrà l'autostrada A13. Duas persunas han pers la vita, ina persuna è anc adina sparida. Var 20 abitantas ed abitants èn anc adina evacuads.
Pir dacurt ha ina famiglia pudì turnar en la zona blaua. Giudicetti quinta che tut las persunas evacuadas possian turnar enfin la fin dal 2028 – sche tut va tenor plan.