AutoDaPosta schlargia sia purschida tranter Cuira e Bellinzona. Quai vala era per tut las lingias da bus en il Mesauc e la Val Calanca, scriva l'interpresa. Uschia datti da nov mintg’ura ina colliaziun tranter Cuira e Bellinzona. Ultra da quai datti sin quest traject mintga duas uras in curs svelt cun colliaziuns perfetgas a Bellinzona sin l'Eurocity vers Milaun sco er en direcziun Lugano e Locarno. E durant las uras marginalas vegni a dar curs supplementars.
Meglras colliaziuns en il Mesauc
Per ils abitants e las abitantas dal Mesauc datti cun la midada d'urari colliaziuns pli attractivas. Uschia van ils bus da la lingia 541 davent da Tusaun – enstagl da sco fin uss fin a San Bernardino – fin a Mesocco. Davent da là datti lura durant l'emna mintga mes'ura ina colliaziun a Castione, nua che bleras lingias dal Tessin e per part er da la Lombardia vegnan ensemen.
Grazia a las novas colliaziuns d'AutoDaPosta ed al nov tunnel da basa dal Ceneri vegn il viadi da Mesauc a Lugano scursanì per radund 20 minutas. Quai che correspunda circa ad in terz dal temp da viadi.
Ord l'archiv: