Cun la midada da l’urari dals trens la dumengia, ils 12 da december, è vegnì inaugurà il nov traject «Aare Linth» da la Viafier Sidost. Tranter auter datti uss in tren direct da Cuira enfin Berna.
Quellas colliaziuns han per consequenza ch’in ni l’auter vegn a dir: Jau vom en l’avegnir dapli cun il tren e lasch mes auto en garascha.
Bain direct ma ditg sin viadi
Uschè direct n’è quai tren dentant betg. Il viadi da Cuira enfin Berna, cun midar tren a Turitg, cuzza normalmain 2 uras e 20 minutas. Cun la lingia directa na ston ins bain betg midar tren a Turitg, persuenter cuzza il viadi passa 3 uras. Pertge il tren ferma 16 giadas.
Ins ha in zichel pli ditg, ma da l’autra vart na ston ins betg midar tren. Per persunas pli passadas ni era famiglias po quai esser in grond avantatg.
La Viafier Sidost surprenda uschia il traject dal «Bummler» da la Viafier federala SBB. Il tren svelt da Cuira enfin Turitg, che ferma be a Landquart e Sargans, datti dentant vinavant.
In mument istoric per la Viafier Sidost
L'inauguraziun dal nov traject «Aare Linth», saja in di istoric, communitgescha l'interpresa. Uschia ha la Viafier Sidost era augmentà il dumber da collavuraturas e collavuraturs per 200, sin nov 850. Sper il traject «Aare Linth» ha la Viafier Sidost dapi il december 2020 era il traject «Treno Gottardo».
Ulteriuras midadas da l'urari
Grazia a la midada da l’urari datti intginas novas colliaziuns, sco per exempel in tren da notg da Turitg ad Amsterdam, quai via Basilea e Cologna. Er il viadi a Minca vegn pli curt e dura anc trais uras e mesa davent da Turitg.
Ultra da quai vegn il tren IC5 Genevra-eroport-Turitg-Son Gagl ussa fin a Rorschach. E lura cursescha durant l'enviern, Nadal enfin Pasca, tranter las 14:00 e 20:00 uras mintga mes'ura in tren tranter Cuira a Turitg. Il rest da l'onn datti in tact da mes'ura tranter las 14:00 e 19:00 uras.