Siglir tar il cuntegn

Header

Martin Candinas e Benedikt Würth vid inaugurar la locomotiva grischa cun scrit si «Calanda».
Legenda: Inauguraziun dal nov traject cun la locomotiva «Calanda» Da sanester: Il pledader da medias da la SOB, Conradin Knabenhans, il president dal servetsch d’infurmaziun per il traffic public LITRA, Martin Candinas, il president dal cussegl d'administraziun da la SOB, Benedikt Würth. RTR/Ronja Muoth
cuntegn

Midada d'urari Tren da Cuira a Berna: Colliaziun directa cun bleras fermadas

Cun la midada da l’urari dals trens la dumengia, ils 12 da december, è vegnì inaugurà il nov traject «Aare Linth» da la Viafier Sidost. Tranter auter datti uss in tren direct da Cuira enfin Berna.

Quellas colliaziuns han per consequenza ch’in ni l’auter vegn a dir: Jau vom en l’avegnir dapli cun il tren e lasch mes auto en garascha.
Autur: Martin Candinas president dal servetsch d’infurmaziun per il traffic public LITRA
audio
Colliaziun directa cun bleras fermadas
ord Actualitad dals 12.12.2021.
laschar ir. Durada: 3 minutas 56 Secundas.

Bain direct ma ditg sin viadi

Uschè direct n’è quai tren dentant betg. Il viadi da Cuira enfin Berna, cun midar tren a Turitg, cuzza normalmain 2 uras e 20 minutas. Cun la lingia directa na ston ins bain betg midar tren a Turitg, persuenter cuzza il viadi passa 3 uras. Pertge il tren ferma 16 giadas.

Ins ha in zichel pli ditg, ma da l’autra vart na ston ins betg midar tren. Per persunas pli passadas ni era famiglias po quai esser in grond avantatg.
Autur: Martin Candinas president dal servetsch d’infurmaziun per il traffic public LITRA

La Viafier Sidost surprenda uschia il traject dal «Bummler» da la Viafier federala SBB. Il tren svelt da Cuira enfin Turitg, che ferma be a Landquart e Sargans, datti dentant vinavant.

In mument istoric per la Viafier Sidost

L'inauguraziun dal nov traject «Aare Linth», saja in di istoric, communitgescha l'interpresa. Uschia ha la Viafier Sidost era augmentà il dumber da collavuraturas e collavuraturs per 200, sin nov 850. Sper il traject «Aare Linth» ha la Viafier Sidost dapi il december 2020 era il traject «Treno Gottardo».

audio
Cusseglier naziunal Martin Candinas, ch'è era president dal Litra
ord RTR Audio dals 12.12.2021.
laschar ir. Durada: 1 minuta 16 Secundas.

Ulteriuras midadas da l'urari

Grazia a la midada da l’urari datti intginas novas colliaziuns, sco per exempel in tren da notg da Turitg ad Amsterdam, quai via Basilea e Cologna. Er il viadi a Minca vegn pli curt e dura anc trais uras e mesa davent da Turitg.

Ultra da quai vegn il tren IC5 Genevra-eroport-Turitg-Son Gagl ussa fin a Rorschach. E lura cursescha durant l'enviern, Nadal enfin Pasca, tranter las 14:00 e 20:00 uras mintga mes'ura in tren tranter Cuira a Turitg. Il rest da l'onn datti in tact da mes'ura tranter las 14:00 e 19:00 uras.

RTR novitads 12:00

Artitgels legids il pli savens

Scrollar a sanestra Scrollar a dretga