Siglir tar il cuntegn

Header

video
Segirar las restanzas da la pli veglia pendiculara
Or da sil punct dals 20.07.2022.
laschar ir. Durada: 2 minutas 16 Secundas.
cuntegn

Miniera en Val Schons La staziun da la pli veglia pendiculara grischuna è sanada

Las lavurs da sanar la staziun da muntogna da la pli veglia pendiculara dal Grischun èn terminadas. La pendiculara vegniva duvrada per transportar il crap cun en il metal. En la renovaziun èn vegnids investids 113'000 francs.

La pendiculara Gruobas è vegnida construida l'onn 1866 da la societad da minieras Val Sassam Mines Company. Da quest temp aveva l'industria da miniersas conjunctur'auta en la regiun da la Viamala. La staziun da muntogna da l'anteriura pendiculara è ina perditga istorica che regorda a las stentas dals miniers.

Investì dapli che 100'000 francs

Il mantegniment da quest monument istoric è stà en privel, cun quai che pliras parts dal mir eran gia ruts. Grazia l'acziun d'agid ch'ha custà 113'000 francs, saja gartegià da mantegnair il monument per l'avegnir. Quai ha ditg Johannes Mani, il president da l'uniun minieras Rain Posteriur. Agid finanzial ha l'uniun tranter auter survegnì dal chantun, agid organisatoric hai dà dal Parc Beverin.

Il Grischun è stà lieu impurtant da minieras

Ch'il Grischun era anc avant 150 onns in lieu impurtant per l'industria da miniera è oz prest emblidà. I vegniva bajegià giu fier, argient ubain era mangan. Ils guauds eran prest svanids perquai ch'i duvrava bler laina per stgaudar las pignas per luar ils metals. Oz n'è da questa veritabla industria restà prest nagut pli. Mo qua e tscha miraglia. Uschia era da la pendiculara, ch'è fitg probabel la pli veglia dal Grischun. La pendiculara da las «Gruobas Ursera» che sa chattava sur Ferrera.

L'uniun Minieras Rain Posteriur ha finì las lavurs per mantegnair il fundament da questa pendiculara. Quella vegniva duvrada per transportar il crap cun en il metal da las minieras gist sut la muntogna enfin a Ferrera, nua ch'il metal vegniva elavurà. Davent da las differentas gallarias da minieras (ch'èn per part oz anc accessiblas sin ina tura guidada) vegniva la crappa transportada sin binaris tar la staziun da muntogna. Quella funcziunava senza forza electrica, mo cun la paisa da la crappa vegniva ella messa en funcziun.

Dissegn cun nov miniers che lavuran cun martels en ina miniera.
Legenda: In dissegn che mussa la lavur da miniers avant tschientaners. RTR, Casper Nicca

RTR sil punct 17:45

Artitgels legids il pli savens

Scrollar a sanestra Scrollar a dretga