Siglir tar il cuntegn
cuntegn

Grischun Mintga terz Grischun ha premia reducida d'assicuranza da malsauns

En il Grischun survegn radund in terz da la populaziun ina reducziun da la premia da l'assicuranza da malsauns. Cumpareglià cun la situaziun avant 10 onns è quai il dubel. En il Grischun è la reducziun individuala da las premias a la cassa da malsauns la pli auta da tut ils chantuns.

Legenda: Guardar il video Il Grischun paja la pli auta reducziun da premias. Durada 00:23 minutas.
Or da Telesguard dals 06.12.2018.

Cun la dublegiaziun da la summa ils ultims 10 onns pajan ozendi Chantun e Confederaziun radund 122 milliuns francs a Grischunas e Grischuns per gidar a pajar las premias. Concret èsi 35'000 tegnairchasas che profiteschan da la reducziun individuala.

Raschuns datti pliras. Tranter autras il fatg che las premias da las assicuranzas da malsauns creschan mintg'onn. Ch'il Grischun paja il pli bler da tut ils chantuns en Svizra ha però era da far cun il fatg ch'inqual chantun che pajava auta summas ha midà sias leschas. Quai per avair sut controlla las expensas.

Il Grischun n'ha dapi passa 10 onns fatg naginas adattaziuns. Ch'il zenit saja plaunet cuntanschì cun sustegnair mintga terz Grischun, è era stà d'udir en la debatta da preventiv en il Cussegl grond.

Sin nivel svizzer 4,5 milliardas francs

En Svizra survegn ina quarta da la populaziun ina reducziun da las premias da la segirada da malsauns. A Confederaziun e chantuns ha quai custà 4,5 milliardas francs. Las differenzas da chantun a chantun èn grondas.

RR novitads 11:00