La regenza grischuna vul examinar en moda pli detagliada il temp dal naziunalsocialissem en il Grischun. Quai è la consequenza da la debatta davart il crap commemorativ per schuldads tudestgs morts durant l'emprima guerra mundial en il santeri Daleu a Cuira. Retschertgas da SRF avevan mussà ch'il crap era vegnì mess si d'ina gruppa naziunalsocialistica en ils onns 30.
Regenza vul ina survista
En l'ultima sessiun dal Cussegl grond ha il deputà Tino Schneider da l'Allianza dal Center fatg la dumonda a la regenza da laschar analisar scientificamain l'istorgia dal faschissem e naziunalsocialissem en il Grischun cun in focus sin il temp avant la segunda guerra mundiala.
La regenza ha respundì ch'ella beneventia perscrutaziuns davart il tema. En ils ultims onns sajan dentant gia vegnidas publitgadas pliras lavurs davart il tema da la segunda guerra mundiala en il Grischun, ch'hajan purtà enconuschientschas impurtantas dal faschissem ed il naziunalsocialissem en il Grischun.
Avant ch'incumbensar directamain novas perscrutaziuns vul la regenza per quai incaricar l'emprim persunas spezialisadas da registrar il stadi da perscrutaziun actual e d'identifitgar las largias da perscrutaziun existentas.
Decider definitiv en chaussa davart l'incumbensa sto il Cussegl grond en ina da las proximas sessiuns.
Contextualisar il crap
Ina segunda dumonda da la deputada Silvia Hofmann aveva pretendì, sper dapli perscrutaziun davart il tema, er da contextualisar il crap per la populaziun.
La regenza ha uss respundì, ch'ella saja pronta da prender l'iniziativa ensemen cun la citad da Cuira per mantegnair e per contextualisar il crap. Quai cun la finamira d'infurmar e sensibilisar la populaziun.
