Suenter la scuverta dal monument da nazis a Cuira hai dà ina debatta publica co tractar l'istorgia enturn quel. En sia sessiun da zercladur ha il Cussegl grond decis cun gronda maioritad da laschar sclerir l'istorgia dal faschissem e dal naziunalsocialissem en il chantun.
La discussiun enturn il monument en il santeri Daleu a Cuira per schuldads tudestgs morts en l'Emprima Guerra Mundiala, haja mussà il basegn da sclerir l’istorgia, uschia hai num en l'incumensa dal deputà Tino Schneider da l'Allianza dal Center. Surtut mussia questa debatta che spezialmain il temp enturn il cumenzament da la Segunda Guerra Mundiala na saja mai vegnì perscrutà sistematicamain en il Grischun.
Debatta davart co tractar il crap e l'istorgia
Gia cura ch'il crap è vegnì scuvert, ha la discussiun gia cumenzà: Silvia Hofmann (PS), istoricra e commembra dal Cussegl grond, ha pretendi envers SRF da laschar il crap:
Il crap duai vegnir in memorial per quai temp stgir ch'ins ha er sentì en la Svizra.
Sumegliant ha Tino Schneider (AdC) vesì quai, commember dal parlament da la citad Cuira, ed er istoricher. Cun sia moziun vul el che l'origin dal monument vegnia fatg visibel, lascha dentant avert, co ch'igl è da tractar il lieu sin il santeri Daleu. Impurtant saja che persunas che visitan il santeri sappian per tge che quest monument stat.
Il basegn da lavurar si l'istorgia dal naziunalsocialissem en il Grischun n'han betg tuts e tuttas vesì. Per il cusseglier da la citad Rainer Good (PLD) fiss la chaussa rugalada sch'ins montescha ina tavla d'infurmaziun: «Ins sa uss danunder ch'il crap vegn e tge ch'el muntà. Ins dat in pau memia bler paisa a quai», ha el ditg envers Radio SRF. Malgrà ch'el condemna la regenza naziunalsocialistica, n'ha el betg suttascrit la moziun da Tino Schneider.
Quella è vegnida approvada cun 19 da 21 vuschs en il parlament da Cuira. Cun quai survegn il Cussegl da la citad l'incumbensa da lavurar si scientificamain l'istorgia dal monument. Uss datti er sin nivel chantunal il medem intent.
