Leo Jeker n'ha betg be laschà enavos fastitgs en la naiv mabain er en la politica. Ils dus cumpogns da viadi Sep Guetg, anteriur president communal da Savognin e Heinz Dudli, anteriur deputà, sa regordan dal pionier da turissem. Sep Guetg haja gì ina stretga relaziun cun Leo Jeker, sia mort saja vegnida nunspetgadamain. Anc oz hajan els gì regularmain contact e magari telefonà in cun l'auter. Jeker saja stà ina persuna ch'ins pudeva fidar e plain engaschi ed energia, di Guetg. Ensemen èn els dus er stads engaschads en il club da skis.
Heinz Dudli è sesì ensemen cun Leo Jeker en il Cussegl grond ed è stà collega da partida en la Partida populara svizra. Els hajan adina fatg cumbat electoral communabel e sustegnì in l'auter. Heinz Dudli ch'è er stà il convischin a Zizers da Leo Jeker descriva el sco sco politicher equilibrà, ch'haja tedlà tiers ed argumentà per la chaussa. Quai saja stada ina bella qualitad ch'el haja stimà fermamain.
Revoluziun en il territori da skis
Il december 1978 ha Leo Jeker revoluziunà l'industria da skis svizra – a Savognin produceschan las pendicularas per l'emprima giada naiv cun chanuns, quai durant in temp che la naiv tecnica era anc nagin tema en Grischun. L'indriz che Leo Jeker ha installà a Savognin era da lezzas uras schizunt il pli grond indriz d'ennavar en l'Europa. Inspirà l'idea d'installar quest implant da naiv tecnica aveva tenor Leo Jeker la mancanza da naiv.
Per sia ovra da la vita ha Leo Jeker, ch'è naschì a Churwalden, survegnì gronda renconuschientscha. Il 2004 è Leo Jeker vegnì undrà sco «pendicularist svizzer da l'onn». Dus onns pli tard ha el survegnì il premi da turissem «Milestone». Ed il 2018 è Leo Jeker lura anc vegnì undrà sco commember d’onur a la radunanza generala da las Pendicularas dal Grischun.
60 onns pendicularas Savognin
Suenter in emprendissadi da commerzi ha Leo Jeker furmà las pendicularas da Savognin l'onn 1962. Là ha el lavurà bunamain sia entira vita professiunala. 30 onns ditg è el stà directur da las pendicularas. L'onn 2008 ha Vendelin Coray lura surpiglià l'uffizi. Tuttina è Leo Jeker restà collià en ina u l'autra furma cun las pendicularas durant passa in mez tschientaner. Pir avant dus onns è Leo Jeker sa retratg dal cussegl d'administraziun.
Il «pli aut Grischun»: sia carriera politica
Sper sia gronda influenza sin il turissem d'enviern ha Leo Jeker era gì success remartgabel sco politicher. Cumenzà ha sia via politica cun divers uffizis communals a Zizers. Silsuenter hai manà el en il Cussegl grond dal chantun Grischun, nua ch'el è restà durant 24 onns. Ils onns 2007 e 2008 è Leo Jeker schizunt stà «il pli aut Grischun» sco president dal Cussegl grond.
Cudesch illustrescha sias prestaziuns
In onn avant sia mort è lura cumparida la biografia «Machen!» che dat in'invista en la vita fitg activa da Leo Jeker. L'idea da far in cudesch hajan pliras persunas en ses conturn ed or da la famglia gì, aveva Leo Jeker declerà.
Il pli fitg ha fatg surstar mai quant bler che Leo Jeker ha fatg en sia vita.
Ensemen cun l'autur Jano Felice Pajarola ha Leo Jeker rimnà tut las staziuns ed istorgias ord sia vita. Il pli fitg ha fatg surstar l'autur quant bleras chaussas che Leo Jeker ha fatg durant sia vita. I na saja betg stà pussibel d'integrar tut. Il cudesch illustrescha era tge gronda muntada ch'il sport ha gì en sia vita.