La regenza conceda ina contribuziun per la segunda fasa da la restauraziun da l'hotel «Löwe» a Mulegns. Quel vegn renovà totalmain da la Nova Fundaziun Origen. Perquai ha il chantun concedì ina contribuziun da 189'000 francs. En questa segunda fasa vegnan renovadas las chombras, sco er l'infrastructura da la cuschina, l'electricitad ed il stgaudament. La chasa da posta daventa in shop, ina recepziun ed ina centrala da stgaudament. En ina emprima fasa han ins sanà il tetg, sco era la fassada e las fenestras. Per quella aveva la regenza contribuì 192'000 francs. Ils custs totals dal project muntan a 6,3 milliuns francs.
L'hotel «Löwe» è situà a l'entrada sid dal vitg da Mulegns sper la via dal Güglia. El è ina da las paucas perditgas che datescha dal temp da la construcziun tempriva d'hotels en il Grischun e ch'è per gronda part anc en in stadi autentic. L'hotel ch'è vegnì construì l'onn 1870 ed engrondì fundamentalmain l'onn 1897, regorda a l'emprim temp da fluriziun dal turissem e dal traffic da charrotschas da posta en il Grischun. L'hotel e la chasa da posta caracteristica dattan ina impressiun da la relevanza sociala ed economica dal manaschi d'hotel sco er da sia impurtanza per l'architectura locala.
