En lur dumonda a la regenza vulevan deputà Tomaschett e cun el ulteriuras 44 deputadas e deputads vegnir a savair dapli davart la pratica da dar multas en Grischun.
En il center da lur interess era la dumonda, schebain igl existissan tar la polizia chantunala dal Grischun valurs previsas per multas disciplinaras e per denunzias che hajan da vegnir cuntanschidas mintga onn e – sche gea – tgenina influenza che quella pratica haja sin la carriera futura dad in policist.
Finamiras datti, dentant betg fiscalas
La resposta da la regenza pertutgant finamiras fiscalas è clera: da quellas n’existan naginas. La polizia chantunala haja dentant «fixà finamiras operativas minimalas per tschertas activitads polizialas» scriva la regenza. Latiers appartegnian tranter auter multas disciplinaras, controllas da persunas sco er denunzias en il sectur dal traffic sin via e dals narcotics.
Las multas disciplinaras a chaschun da controllas da radar na fan explicitamain betg part da quai, precisescha la regenza.
RR novitads 12:00