Siglir tar il cuntegn

Header

audio
Co vinavant suenter il stgarp d'ina vatga-mamma sin l'alp Nurdagn
Or da Actualitad dals 11.07.2022.
laschar ir. Durada: 5 minutas 47 Secundas.
cuntegn

Muntogna da Schons Lufs stgarpan vatga-mamma

La notg da venderdi sin sonda han lufs stgarpà ina vatga-mamma sin l'Alp Nurdagn.

video
Stgarpada da vatga-mamma
Or da sil punct dals 11.07.2022.
laschar ir. Durada: 2 minutas 8 Secundas.

Il lieu nua ch’ins ha chattà l'animal da niz mort è en il territori dal triep da lufs dal Beverin. Sco il chantun scriva, è quest stgarp l’emprim cas en il Grischun nua ch’in animal creschì da la famiglia bovina è vegnì stgarpà dad in u plirs lufs. La vatga-mamma da set onns era, ensemen cun autras vatgas, en in areal cun ina saiv enturn.

Quai è in triep che sa deporta fitg problematic. En in management da lufs futur stuain nus dir che quai è in triep ch'ins stuess pudair allontanar cumplainamain.
Autur: Adrian Arquint manader da l'Uffizi da chatscha e pestga grischun

En il territori dal luf dal Beverin han ils lufs gia stgarpà dapli animals da niz (nursas e chauras) che quai che la lescha federala prevesa per pudair regular in triep. Dentant pon ins sajettar ils lufs d'in triep pir cura ch'igl è confermà che quel ha er propi pitschens. Vegn vitiers ch'il bab e la mamma d'in triep èn protegids e na pon gnanc vegnir sajettads. Be la mesadad dals pitschens ch'i ha dà quest onn, pon lura vegnir sajettads. Pia be quels lufs che n'han per regla anc fatg nagut. Ils lufs vegls che dattan vinavant il cumportament problematic èn però protegids.

Mesiras effectivas cunter ils lufs en ina tala situaziun vegnan però pir pussaivlas cun ina revisiun da la lescha da chatscha. Actualmain è quella incl. la regulaziun preventiva da lufs problematics en discussiun en il parlament a Berna. Fin che la lascha revidida pudess ir en vigur cuzzi però almain fin il 2024.

audio
La reacziun d'Adrian Arquint
ord Actualitad dals 11.07.2022.
laschar ir. Durada: 2 minutas 30 Secundas.

Emprova da scurrentar luf

L’emprova dals guardiaselvaschinas da narcotisar in dals lufs per montar in emettur da GPS n’è betg reussida. Durant duas notgs han ils guardiaselvaschinas observà il territori senza success. Cun quella mesira vuleva l'uffizi per l'ina scurrentar ils lufs e per l’autra fissi cun l'emettur stà pussaivel da vesair nua ch’il triep è da viadi.

Las autoritads responsablas constateschan ch'il triep dal Beverin sa deporta gia dapi plirs onns a moda fitg problematica.
zitat or da la communicaziun dal chantun

Las autoritads dal chantun sa fan quitads damai ch'ils lufs dal triep dal Beverin sa cumportan gia dapi plirs onns a moda fitg problematica. Il stgarp d'ina vatga-mamma correspunda – cumpareglià cun stgarps da nursas e chauras – ad ina ulteriura e nova dimensiun.

Nairas uras da regular il triep

Il president da la regenza grischuna Marcus Caduff crititgescha a moda vehementa l'Uffizi federal per l'ambient en connex cun la stgarpada d'ina vatga mamma en la Val Schons. L'uffizi aveva ditg ch'i na detti il mument nagin basegn d'agir en chaussa luf perquai che la gronda part dals animals da niz vegnian stgarpads en lieus nua ch'i na dettia naginas mesiras da protecziun. Caduff scriva ussa sin Twitter ch'el na possia betg pli udir quai – il triep dal Beverin stoppia gia daditg vegnir regulà.

Or da l'archiv

video
Alp Lavaz e las mesiras da protecziun cunter il luf
Or da Telesguard dals 20.06.2022.
laschar ir. Durada: 4 minutas 54 Secundas.

RTR novitads 23:00

Artitgels legids il pli savens

Scrollar a sanestra Scrollar a dretga