Siglir tar il cuntegn

Header

video
Exposiziun Augusto Giacometti
Or da Telesguard dals 26.01.2024.
laschar ir. Durada: 3 minutas.
cuntegn

Museum d'art dal Grischun Augusto Giacometti – «Contemplazione»

Il museum d'art dal Grischun mussa in'exposiziun deditgada ad Augusto Giacometti. «Contemplazione» sa concentrescha sulettamain sin lavurs sin palpiri.

Augusto Giacometti è stà in savrin dal grond Giovanni. Augusto haja adina gì in zic in'egliada en l'auter mund – di il directur dal Museum d'art dal Grischun Stephan Kunz. Perquai haja l'exposiziun il titel «Contemplazione», i giaja per in'autra contemplaziun dal mund.

Collavuraziun cun la chasa d'art Argoviana

Il Museum d'art dal Grischun ha planisà l'exposiziun en collavuraziun cun la Chasa d'art argoviana ad Aarau. Parallel a l'exposiziun a Cuira pon ins er admirar ovras dad Augusto Giacometti en l'Argovia. Là vegn mussà art liber e lavurs d'incumbensa sco per exempel maletgs da paraid u pictura sin vaider. L'exposiziun a Cuira sa concentrescha percunter dal tuttafatg sin lavurs sin palpiri. L'interessant vi da quell'exposiziun saja ch'in possia suandar il process fin tar in'ovra: preschantads vegnan sbozs e skizzas en variaziuns, maletgs finids or dals quals ch'igl haja pli tard per part er dà picturas. Mussà vegnan per exempel er sbozs da pictura sin vaider ch'èn da vesair en la baselgia S. Martin a Cuira. Ina gronda part dals exponats è or da l'atgna collecziun dal Museum d'art dal Grischun. Cumplettà vegn ella cun varsaquantas skizzas d'ina donaziun da l’architecta Tilla Theus.

audio
Augusto Giacometti en il center dal museum d'art GR
ord Actualitad dals 27.01.2024. Maletg: RTR
laschar ir. Durada: 2 minutas 40 Secundas.

Extraordinari

L'extraordinari da l'exposiziun dad Augusto Giacometti saja per l'ina la diversitad dals exponats e per l'autra ch'ins possia ir al coc u a l'entschatta da la creaziun artistica. Sin basa da skizzas e studis exponidas vesan ins il svilup d’ina idea per in maletg. Stephan Kunz di, ch'els hajan exnum vulì far quell'exposiziun parallel ed en collavuraziun cun la Chasa d'art argoviana ad Aarau. Uschia ch'in possia giudair en dus lieus l'entir Alberto Giacometti.

RTR telesguard 17:40

Artitgels legids il pli savens