In animal periclità
Il luschard taclà è ina da quatter spezias da luschards en Svizra. La populaziun saja dentant sa diminuida considerablamain ils ultims onn, di il pedagog dal museum Flurin Camenisch. L'animal è sin la glista cotschna da la Confederaziun. Perquai vegn mussà co il luschard viva e tge che mintgin e mintgina po far per proteger el. Tranter auter è quai da mintgatant laschar in zic dischurden en l'agen curtin:
Ins ha il sentiment che tut stuess avair ses plaz ed esser en urden. Ins pudess dentant engrondir il spazi da viver dals luschards verds cun laschar intgina roma per ch'els pon sa zuppar.
Dapli tips datti lura en l'exposiziun davent dals 9 da mars enfin ils 6 d'avust. Pli tard lura, ils 24 d’avust enfin ils 21 da schaner 2024 è il museum deditgà a l'animal da chasa popular en Svizra – il giat. Qua èn 1,5 milliuns giats registrads.
In animal popular
Tranter auter mussa il museum danunder ch'il giat deriva e cura ch'el è vegnì dumestitgà. Era sch'il animal pailus passenta bler temp en chasa, saja el era ina part dal sistem ecologic, di Flurin Caviezel. Uschia vala era il luschard verd, sper mieurs ed utschels, sco preda bainvesida. Ils dus animals ch'han sin l’emprima egliada pauc communabel, han pia tuttina da far insatge in cun l'auter.