Il project da renovar ed engrondir la «Ciäsa Granda» a l'ur dal vitg da Stampa en la Val Bregaglia duai vegnir a custar 15 milliuns francs. Per gidar ed avair in fund finanzial per la fundaziun «Ciäsa Granda Stampa/Atelier Giacometti», duai la vischnanca da Bregaglia contribuir in credit da passa 1,5 milliuns, quai tenor il president communal da Bregaglia Fernando Giovanoli.
Renovar tetg, chombras e reducir barrieras
La Ciäsa Granda a Stampa è dapi circa dus onns en il possess da la fundaziun «Museum Ciäsa Gronda ed atelier Giacometti». Questa fundaziun ha l'incumbensa da manar il museum e da purtar enavant la sanaziun e renovaziun da l'edifizi. Il project na cumpiglia betg l'atelier Giacometti, che è en in'autra chasa gist sper il museum. La Ciäsa Granda saja impurtanta sco post fix en la Val Bregaglia, cun quai era per la vischnanca, di il president da la fundaziun Jakob Messerli.
Cun ils 15 milliuns duai vegnir renovà il tetg, las chombras da la chasa, ed er vegnir engrondidas las pussaivladads da las exposiziuns. Dentant er l'access per glieud cun impediments duai vegnir fatg en la chasa dal 16avel tschientaner, ensemen cun in magasin per las ovras d'art en possess dal museum.
Visualisaziuns da la nova Ciäsa Granda
-
Bild 1 von 2. Uschia duai la Ciäsa Granda guardar ora ina giada. Bildquelle: Fundaziun «Museum Ciäsa Granda ed atelier Giacometti».
-
Bild 2 von 2. La part davos da la Ciäsa Granda a Stampa cun la nova part. Bildquelle: Fundaziun «Museum Ciäsa Granda ed atelier Giacometti».
La vischnanca duai gidar cun l'emprim pass
Per il president communal Fernado Giovanoli è il museum ina instituziun fitg impurtanta per la Val Bregaglia. Cun las exposiziun cun ovras d’art da differents artists da la val ed era sco lieu nua che l’istorgia vegn preservada per las generaziuns che vegnan.
Il museum è nossa ierta. Perquai duain nus prestar nossa part per conservar el.
Uschia duai il credit sur da maximalmain 1,5 milliuns francs u 10% da la summa totala gidar a la fundaziun sco emprim pass per il rest da la finanziaziun ed esser in cler mussament d'attaschada al museum Ciäsa Gronda. Tenor il president communal Fernando Giovanoli ed il president da la fundaziun Jakob Messerli, èsi difficil da ramassar ensemen ils 15 milliuns francs per il project da sanaziun ed engrondiment sche la populaziun na sustegna betg l'affar.
Ed era sche ils Bregagliots e las Bregagliottas sa decidan per il credit pudess la tschertga da daners durar plirs onns. En il meglier cas durass quai dus onns, ha ditg il president da la fundaziun Jakob Messerli envers RTR.
Dentant ina nova cunvegna da prestaziun
Er duai la fundaziun survegnir sustegn finanzial per sias activitads en il museum. Fin ussa ha la vischnanca Bregaglia decidì da project a project sch'ella dat ina contribuziun u betg.
Fin ussa avain nus dà mintg’onn circa 40’000 francs a la fundaziun per differents projects, ed igl è vegnì memia cumplitgà. Perquai avain prevesi ina cunvegna da prestaziun per ils proxims quatter onns.
Uss è pero ina cunvegna da prestaziun sin maisa che prevesa da contribuir per ils proxims quatter onns mintgamai 50’000 francs per il manaschi e las autras activitads da la fundaziun «Ciäsa Granda ed atelier Giacometti» a Stampa. Tuttas duas propostas duain vegnir tractadas a la proxima radunanza communala