La fin dal 18avel tschientaner eran ils Lötschers ina famiglia da purs sco tut tschellas er en il Partenz. Peter Lötscher è alura stà mercenari (schuldà en servetsch per in auter pajais) ed è arrivà en ils Pajais Bass. Là ha el tgunsch emprendì co lavurar cun arschiglia.
Monopol durant il 19avel tschientaner
Durant quatter generaziuns han ils Lötschers producì vaschella, pignas da terracotga e tumbins da cheramica. E schegea ch'i vegniva importà bler cheramica sur ils pass ord l'Italia, or dal sid da la Germania u ord la Val dal Rain – en il Partenz eran ils Lötschers il numer in.
Ils vaschlers a St. Antönien avevan in monopol en la regiun, tranter Landquart e Tavau na devi numnadamain nagina concurrenza.
Viafier Retica sco «killer»
Cun l'extensiun da la rait da tren da la Viafier Retica en la regiun, n'han ils Lötschers dentant betg pli pudì surviver encunter la concurrenza enturn 1900. In'inundaziun ad Ascharina sut St. Antönien il 1910, ha lura era devastà il local da producziun. Sulettamain la chasa paterna dal davos vaschler pon ins anc vesair ad Ascharina.
Ils da St. Antönien èn loschs da lur stgazi
Per St. Antönien èn ils artefacts d'immensa impurtanza.
En il vitget alpin en il Partenz è la glieud conscienta e loscha da l'istorgia dals Lötschers. Intginas persunas privatas han er anc in u l'auter toc en lur possess, sco per exempel in cup, ina vasa, ina platta construida en lur pigna da terracotga u in tumbin da cheramica.
Igl è schon donn ch'i na dat betg pli la producziun da cheramica.
RR actualitad 17:00