Il venderdi stat sut l'ensaina da bands grischunas da dialect e rock – sincer, plain forza ed autentic. La sonda surpiglian rap e hip hop il terren e procuran cun beats e shows energeticas per in'atmosfera urbana al festival. Il line up n'è anc betg enconuschent en detagl, duess però vegnir preschentà las proximas duas emnas.
Tge ch'ins po gia ussa dir davart il line up: Acts internaziunals na vegn quai betg a dar sin la tribuna. L'idea era d'emprim ennà in openair per musicists e musicistas da la regiun. Ina part dals acts han ils organisatursv e las organisaturas contactà, per part han ils artists e las artistas dumandà sez e sezzas sch'els dastgian sunar a l'openair.
Ultra da la musica spetga las visitadras ed ils visitaders in areal da festival multifar cun stans da culinarica regiunals, cun purschidas creativas da streetfood, bars e lounges patgificas. Plinavant datti zonas d'inscunter schluccadas ed in'atmosfera ch'envida da star da cumpagnia, da giudair e da far festa.
Nus essan vi da a planisar attracziuns per giuven e vegl, nua che tut la «famiglia» dal EHC Cuira è da la partida.
L'Open Air 7000 duess star per cuminanza, qualitad ed ina convivenza plain respect – in festival per amaturs da musica, per gruppas d'amias, per famiglias e per tuts e tuttas che vulan passentar dus dis nunemblidaivels. Il motto dal festival è: Open Air 7000 – dus dis, dus stils, in festival.
Nus sperain sin il favugn da Cuira e las temperaturas agreablas durant l'openair.
Ils organisaturs e las organisaturas spetgan var 3'000 persunas durant ils dus dis. Plazza avess quai però per anc dapli. Ch'il festival ha lieu il matg n'è betg dal tut ideal – da quell'opiniun è er il president dal EHC Cuira, Carmine Di Nardo – tuttina vul ins far il festival durant la primavaira, perquai che pli tard ha lieu a l'Obere Au la festa federala da tir e suenter cumenza puspè la stagiun da Hockey. Perquai è il matg l'unica pussaivladad per il club da hockey d'organisar uschè in festival.