Sch'i va per la musica populara datti blers clischés e pregiudizis. Quels vul il Museum retic ussa rumper – cun sia nov'exposiziun speziala «grenzenlos lüpfig». In titel ch'implitgescha gia che la musica populara surmunta adina puspè ils cunfins – sajan quai cunfins geografics, cunfins da stils u era ils cunfins tranter citad e champagna. L'exposiziun mussa blera musica – porscha dentant era in'invista en l'istorgia da la musica populara, expona differents instruments ch'èn ed eran populars – e preschenta differents musicants e lur influenza sin la musica populara.
Vinavant ristga l'exposiziun era in sguard en il futur. Ella mussa tocs da musica ch'intelligenza artifiziala ha generà. Quels tocs duajan mussar co che la musica populara pudess eventualmain tunar en futur – e cunquai dar in impuls da reflectar e per discutar.
La speranza saja da na betg mo carmalar fans da la musica populara a l'exposiziun – ma dad era pudair carmalar persunas a l'exposiziun, che n'èn anc nagins fans. E cunquai duajan era puspè vegnir surmuntads cunfins.
