Tut en tut èn sa participads 27 uffants e giuvenils – tranter 10 e 17 onns – al champ da musica populara a St. Antönien. Bunamain tuts e tuttas vegnan dal Grischun. Cunzunt il Partenz e l’Engiadina Bassa èn stads bain represchentads. Ma i dat era singulas da la Tumleastga e schizunt dus giuvenils da la Germania – per dir exact dad Oberstdorf, Allgäu. Igl è pia vegnì discurrì tudestg svizzer, in pau tudestg da scrittira ed era rumantsch.
Il champ da musica populara per uffants e giuvenils vegn organisà dad otg persunas. Ils blers dad els èn scolastas u scolasts da musica ubain era mammas engaschadas. Andrea Thöny è il manader musical dal champ. Per el è la finamira da quest inscunter clera: Pussibilitar in lieu – era per giuvenils ed uffants – da pudair vegnir ensemen e far musica. Viver quella musica populara.
Schizunt durant las pausas vegni fatg musica ensemen. Ils giuvenils vivan quai plainamain.
Tge gira?
Il champ ha gì lieu sur tschintg dis – mesemna enfin dumengia. S’inscuntrà e fatg musica èsi vegnì en il «Volksmusikhus» che sa chatta datiers da la baselgia. Cler, en emprima lingia vai per vegnir ensemen e far musica. Bainvegnids èn stads tuttas e tuts che sunan in instrument. N'emporta betg sche quai è in accordeon, ina battaria ubain ina ghitarra electrica. Tut va, accentuescha Andrea Thöny.
A mai plascha l’atmosfera. Tuts e tuttas han buna luna.
La tematica da quest onn è stada l'Irlanda. Pia, chanzuns da musica populara svizra maschadà cun chanzuns da musica populara da l'Irlanda. Igl ha dà bleras emprovas. A partir da la bun’ura fin la saira. Suenter las emprovas ed il far musica liber hai mintgamai era dà in program spezial che cuntegneva per exempel excursiuns u far gieus. Ch'ils giuvenils han giaudà cumplainamain quella pussaivladad da far musica ensemen mussa er il fatg ch'igl è schizunt vegnì sunà e chantà durant las pausas. Mintga saira hai lura dà l'uschenumnada «Stubete». Vul dir: ils participants e las participantas èn ids en ils restaurants dal vitg per simplamain far musica ensemen – tipic per la musica populara. Quai è mintgamai stà il highlight dal di. Punct culminant è lura stà il concert dumengia saira, nua che amis e famiglias han pudì vegnir a tadlar.
La cumpagnia. Nus avain fitg legher. E natiralmain era da sunar ensemen. Quai è fitg flot.
Durant las emprovas
-
Bild 1 von 3. Il «Jauz»: chant popular. Bildquelle: RTR.
-
Bild 2 von 3. Emprova generala: 19 orgelets, 3 cuntrabass, 2 clarinettas, 2 accordeons ed 1 saxofon. Bildquelle: rtr.
-
Bild 3 von 3. Durant il di vegn fatg musica. 27 musicistas e musicists en quatter stanzas. Bildquelle: RTR.
Far musica populara: è quai schon cool?
Ils dis da musica populara per giuvenils ed uffants han gia gì lieu per la terza giada a St. Antönien. Mintg’onn pon ils organisaturs beneventar novas fatschas. I para da marschar. Entschet cun circa 15, èn sa participads quest onn 27 uffants e giuvenils. Sch’ins auda il pled musica populara lura pon ins dal reminent svelt pensar: quai è plitost insatge per glieud pli veglia. Quels giuvens e quellas giuvnas a St. Antönien han mussà cler il cuntrari. E quai n'ha betg mo da far cun la vestgadira giuvenila ed ils chalzers da sport che las bleras portan – na!
A mai para quella musica fitg coola. Gist cun l'orgelet pon ins fitg simpel accumpagnar era auters stils da musica ed uschia metter accents. Quai fa simplamain buna luna.
Il cool vida la musica populara è ch’ins po maschadar quella cun x autra musica. Saja quai pop u rock. Quai fetschia la musica populara uschè interessanta e betg mo suttamessa a la moda. Decleran ils giuvenils. E sper la musica plascha ad els er la buna atmosfera en cumpagnia da buna luna.
Suenter ils tschintg dis da musica populara per giuvenils ed uffants vai lura direct vinavant cun il champ per creschids – quel ha gia lieu per la 34avla giada a St. Antönien.