Il chor claustral dal gimnasi a Mustér ha ina lunga tradiziun. Quest'onn van ils scolars e las scolaras per la 50avla giada sin turnea e dattan tranter auter era concerts a Cuira. L'um che ha clamà en vita l'uschenumnà «Churer Tag» era il dirigent da quel temp, l'avat Pankratz Winiker. Suenter l'avat Pankratz ha Ursin Defuns dirigì il chor per blers onns ed ha influenzà il chor sur decennis.
Dal 2010 enfin il 2023 ha Clau Scherrer manà il chor. E dapi trais onns maina sia consorta Rilana Cadruvi Scherrer il chor. Emna per emna fa ella las provas per emprender las ovras cun ils giuvenils. Diriger ils concerts finals – quai surlasch'la però anc adina a Clau Scherrer.
I dovra pazienza ed in auter lavurar che cun creschids. I dovra in'autra chapientscha ed in auter linguatg magari – però jau fatsch quai gugent.
Era sch'i saja oz betg pli uschè simpel da motivar giuvenils da chantar en in chor, hajan Rilana Cadruvi e Clau Scherrer anc adina grond plaschair da questa lavur. Blers han auters interess, taidlan autra musica. Tant pli bel èsi, sch'els sa laschan en sin il chor e chattan plaschair da quai.
Sch'ins survegn la schanza e la pussaivladad dad introducir ils giuvenils en quella musica, lura èsi fascinant da vesair, tge plaschair ch'els han era da quella musica.
Pli baud eri obligatoric per tut las scolaras ed ils scolars da chantar en il chor. Oz vala quai mo anc per l'emprima classa. Suenter pon els cuntinuar voluntarmain. Actualmain chantan var 65 giuvenils en il chor.