La pli differenta glieud ha chattà la via en la sala da la chasa da la plaiv Comander a Cuira la sera dals 24 da december. Bel e bain otganta persunas da differentas vegliadetgnas, persunas da l'ester, els tuts e tuttas festiveschan quella saira Nadal. Ina gronda part dals participants e las participantas ha gia surpassà la vegliadetgna da pensiun.
Gidanters voluntaris
En il team dals gidanters e las gidantras è bain enqualin che gida schon plirs onns adina a quest'occurenza. Responsabel per il menu è Georg Pichler da Cuira, ensemen cun sia dunna Beatrix. Gia per la 18avla giada cuschinan els ils 24 da december per quels e quellas che fissan uschiglio persuls da Nadal.
Per nus as chapeschi da sasez che nus faschain ina giada per onn in'occurenza senza trametter in quint.
La motivaziun dals gidanters e las gidantras è da far insatge per glieud che na stat forsa betg usche bain sco els sezs. I saja bi da vesair che la glieud haja plaschair e possia giudair ina bella saira en cumpagnia.
Cun mai vai fitg bain, jau sun sauna e frestga. Ils 24 da december less jau dar enavos in zic da questa fortuna che jau hai a glieud ch'i va forsa betg uschè bain.
A la testa da lôrganisaziun da la saira stat la diaconessa sociala Ute Grommes. Ella organisescha quest onn per l'emprima giada questa occurenza. Ella è cuntenta cun la saira, tut haja funcziunà sco giavischà. Ensemen cun Nathanael Hotz, il diacon social en scolaziun prelegia la diaconessa ina istorgia da Nadal nunconvenziunala en cumbinaziun cun l'istorgia da Nadal classica. Per musica festiva procura quella saira Carlo Kühl, il menader dal chor da gospel Blue Wonderful. Nathanael Hotz sustegna vid la trumbetta. Ed er chantar insembel na manca betg a la saira da Nadal. Sco finiziun chantan tuts e tuttas «Oh du Fröhliche».
Per mai è il pli bel da star da cumpagnia e festivar Nadal senza grond tam tam, quai è per mai Nadal.
