En il Grischun eran in schaner 2'289 persunas senza lavur - quai correspunda ad in quota da dischoccupaziun da 2,1%. Quai è la medema quota sco il december passà, malgrad ch'igl ha dà dapi lura 49 persunas dapli, ch'han pers lur lavur.
Enpli sajan 1'708 persunas, ch'èn en programs dad occupaziun o lavur intermediara, er en tschertga dad ina plazza nova. Quai scriva l’Uffizi per industria, mastergn e lavur dal Grischun.
Augment per 0,1% percunter tar la quota da dischoccupaziun svizra
Uschia è la quota da dischoccupaziun svizra tar 3,8%. Quai mussan las cifras pli novas dal Secretariat da stadi per l'economia (SECO).
163'644 persunas eran s'inscrittas tar ils Centers regiunals per intermediaziun da lavur CIL. Quai sun radund 5'000 persunas dapli ch'en il december. En cumparegliaziun cun il december 2014 èn quai schizunt radund 12'600 persunas dapli, che n'han betg lavur.
Augments era tar la giuventetgna
Tar ils giuvenils da 15 a 24 onns eran radund 21'100 senza plazza. Cun quai è s'augmentada la quota da dischoccupaziun tar la giuventetgna per 2,7% en cumparegliaziun cun il december 2015 - en cumparegliaziun cun il schaner 2015 schizunt sin 8,6%.
RR novitads 08:00