Siglir tar il cuntegn

Header

cuntegn

Grischun Nagina «patenta light» per ustieras ed ustiers

I resta tut sco enfin qua: Ustieras ed ustiers na ston betg frequentar in curs davart l'igiena da victualias. Il Cussegl grond è cunquai cleramain d'in auter avis che la regenza grischuna.

Il president da Gastro Grischun Franz Sepp Caluori (PCD) n'ha gì naginas schanzas cun sia idea d'introducir ina «patenta light» per ustieras ed ustiers. Il Cussegl grond ha refusà sia incumbensa cun 70 cunter 35 vuschs.

Visur cun resultat da votaziun.
Legenda: Il resultat è stà cler. RTR, Nadja Cadonau

«Sche vus avais in problem, lura schliai sez quel»

Sche la branscha da gastronomia haja in problem, lura duai ella tschertgar schliaziuns e betg pretender novas leschas u agid dal chantun. Quai è stà il tenor durant la debatta en il Cussegl grond.

Deputadas e deputads han era crititgà ch'il president da Gastro Grischun vegnia schon puspè cun pretensiuns. Pir avant dus onns ha il Cussegl grond refusà sia proposta da puspè introducir la patenta d'ustiers. Quella ha il chantun Grischun abolì l'onn 1999.

Franz Sepp Caluori ha argumentà ch'i dovria enconuschientschas davart l'igiena. Actualmain perdian ils controlladers da victualias bler temp cun declerar ad ustieras ed ustiers las reglas e leschas.

Era la regenza grischuna fiss stada pronta d'adattar la lescha cun ina tala prescripziun. Ussa però resta tut sco enfin ussa.

RR actualitad 12.00

Artitgels legids il pli savens