Siglir tar il cuntegn

Header

cuntegn

Naiv sin via Servetsch da traffic Viasuisse avertescha d'impediments

Suenter ina notg fraida cun temperaturas bassas naivi en differentas part dal Grischun. Bleras vias en regiuns pli autas èn actualmain cuvertas cun naiv. Il servetsch da traffic Viasuisse avertescha d'impediments e fa attent da charrar plaunsieu e cun precauziun.

Il pass dal Flüela è serrà per motivs da segirezza. Las vias sur ils pass dal Lucmagn, Güglia, Wolfgang, Bernina e Fuorn èn cuvertas cun naiv. E cun naiv ston ins actualmain era quintar sin las vias en regiuns pli autas.

L'enviern è arrivà

La fin d’emmna passada haja dà ina buna porziun naiv en parts dal Grischun. Surtut en il Partenz, la Tumleastga ed en il Scanvetg saja vegnì ensemen fin passa in mez meter naiv nova, sco Jan Eitel da SRF Meteo di. En il Grischun dal Sid e surtut en las valladas talianas n’haja dentant betg propi pudì vegnir alv. En quellas regiuns ch’igl haja gia dà naiv haja actualmain anc dà in pèr centimenters dapli.

audio
Meteo: L'enviern è arrivà
ord Actualitad dals 28.11.2023. Maletg: RTR
laschar ir. Durada: 2 minutas.

Er oz naivi vinavant, en il Grischun dal Nord ed en l'Engiadina Bassa possia anc ina giada dar 10-20 cm naiv nova. Mesemmna datti ina pausa, gievgia naivi vinavant. I po naiver l’entir di fin giu en la Bassa. Il cunfin da naiv po dentant en il decurs da la gievgia ir ensi, uschia ch’i po lura er plover enstagl da naiver.

Il cunfin da naiv fa per il mument in zic in rodeo.
Autur: Jan Eitel meteorolog SRF

Las temperaturas maximalas èn enturn 3 grads en la regiun da Cuira ed en Surselva. En l'Engiadina datti tranter minus 1 e plus 1 grads. En il Mesauc enfin 12 grads. En il decurs dal di vegni pli e pli fraid.

RTR novitads 06:00

Artitgels legids il pli savens