Siglir tar il cuntegn

Header

cuntegn

Naufragi Nandro Solar Reacziun politica: La decisiun dal suveran è d'acceptar

Cun 68% ha Surses refusà l'ovra solara dasper il territori da skis da Savognin/Radons. RTR ha vulì savair da la regenza grischuna e da parlamentaris a Berna tge ch'els din tar quest naufragi.

audio
Intervista cun la cussegliera guvernativa Carmelia Maissen
ord Actualitad dals 30.01.2024. Maletg: Keystone
laschar ir. Durada: 3 minutas 15 Secundas.

Cun il Na a l’ovra Nandro Solar en la vischnanca da Surses, han gia 4 dad 11 ovras solaras grondas fatg naufragi en il Grischun. Sper il Surses han era gia las vischnancas da Mustér e Glion refusà projects. Malgrà quellas decisiuns na sa mida nagut vid la strategia d'energia dal chantun, declera la cussegliera guvernativa Carmelia Maissen.

La cussegliera guvernativa parta dal fatg che la midada dal sistem d’energia en Svizra haja be ina schanza sche las regiuns che stoppian purtar ils implants solars sajan era persvas da quels.

Mintga project ha ses tempo e ses temp

Da medema opiniun sco la cussegliera guvernativa èn era ils parlamentaris grischuns che han prendì posiziun sin dumonda dad RTR. Uschia din ils cussegliers dals chantuns Stefan Engler e Martin Schmid che mintga decisiun d’ina vischnanca saja da respectar. Ils dus politichers ch’en era commembers da la cumissiun per ambient, planisaziun da territori ed energia intuneschan che precis quai saja era ina fermezza dal Solarexpress, numnadamain ch'ils process hajan in tschert tempo. Uschia sappian era investuras ed investurs nua ch'els duajan star londervi e nua betg.

Tenor il cusseglier naziunal Roman Hug è il solarexpress in express che n’era mai in. Forsa che pitschens projects fetschian senn, di Hug, dentant ils gronds sajan era illusorics. Il Grischun duaja vinavant investir pli ferm en forza idraulica.

Schanzas pli grondas per projects «indigens»

In punct sin qual Stefan Engler fa attent è l’impurtanza da projects sustegnids da l’intern. Ins vesia che projects che vegnan d’utrò, sco quel da Surses che vegn da Turitg, hajan main schanzas che quels che vegnan dal Grischun sez, di il cusseglier dals chantuns. Uschia han per exempel Scuol Solar u il project solar a Tavau, quel da Claustra u era quel da Laax gì success.

audio
Reacziuns dals parlamentaris grischuns a Berna
ord Actualitad dals 30.01.2024. Maletg: Keystone
laschar ir. Durada: 4 minutas 39 Secundas.

RTR actualitad 17:00

Artitgels legids il pli savens