Il consum da medias sa mida. Adina pli paucas persunas legian gasettas stampadas, entant che las medias digitalas daventan pli e pli impurtantas. Questa tendenza na sa ferma era betg davant las medias rumantschas. La Fundaziun Medias Rumantschas (FMR) che producescha La Quotidiana ha reagì sin quest svilup e fa ussa in pass en il mund digital.
Nova newsletter cun artitgels gratuits
Dapi glindesdi, ils 3 da november, derasa la FMR mintga di trais texts redacziunals sur ina newsletter gratuita.
Ils artitgels èn accessibels per mintgin sin la pagina d'internet gasetta.ch. Quai èn artitgels che cumparan era mintga di en La Quotidiana.
David Truttmann, schefredactur da la FMR, declera ch'ins veglia chattar vias digitalas per promover la lectura da texts rumantschs en il mintgadi. Plinavant sajan els finanziads publicamain ed i vegnia pretendì ch'ils texts sajan accessibels era senza in abunament da gasetta.
Nuss essan finanziads publicamain e noss donaturs pretendan che nus giajan ina via digitala e che noss texts sajan accessibels er per persunas senza abunament da gasetta.
Era Jon Pult, president dal cussegl da fundaziun da l'FMR, vesa la via digitala sco ina strategia logica.
La strategia da derasar gratuitamain texts rumantschs che cumparan era en la Quotidiana pudess avair consequenzas per la gasetta. La Quotidiana, edida da la Somedia, cuntanscha actualmain radund 3'000 abunents. Silvio Lebrument da la Somedia na vesa per il mument nagin privel en la nova newsletter, ma admetta ch'il titel pudess esser periclità sch'il dumber d'abunaments va enavos.
La Quotidiana porscha bler dapli che quels trais artitgels. Dentant sch'il dumber d'abunaments va enavos, pudess in titel esser periclità. Quai è correct.
David Truttmann constatescha che la glieud ha abunà in bler pli pitschen dumber da gasettas ch'avant 10 onns. Quai saja ina midada fundamentala en il consum da medias.
Quai è simplamain la realitad.
La digitalisaziun è per las medias rumantschas tant ina schanza sco er ina smanatscha. Dad ina vart metta ella las medias tradiziunalas sut squitsch, da l'autra vart porscha ella novas pussaivladads per cuntanscher in public pli giuven. Il temp vegn a mussar sche la strategia digitala da la FMR po garantir in futur per il schurnalissem rumantsch.