La directura generala da la fundaziun Flury ha chalà per immediat. Nicola Katharina Kull ha pir quest fanadur surpiglià la plazza sco nova CEO da la fundaziun da provediment da sanadad dal Partenz. Be quatter mais pli tard sa spartan ella e la fundaziun – quai sin enclegientscha vicendaivla, sco il president da la fundaziun Flury, Christian Kasper, di envers RTR:
Ina soluziun ad intermin
Ad intermin ha l'anteriur schef da las pendicularas da Lai Peter Engler surpiglià il timun. El surpiglia la fundaziun enfin ch'ina nova directura u in nov directur vegn chattà, di Christian Kasper.
Bleras plazzas libras
Sper ina nova directura u in nov directur, tschertga la fundaziun Flury tranter auter er in nov schef u scheffa da persunal ed in'assistenta u assistent da la direcziun e la suprastanza.
I saja ina cumulaziun da plirs facturs pertge che gist uschè bleras plazzas da cader sajan libras, di il president da la fundaziun. Dad in maun sajan quai mutaziuns da persunal tut normalas, sco per exempel pensiun, per l'autra hajan dentant era autras persunas visà la plazza pervia da las differentas opiniuns strategicas, co manar il spital e l'entira fundaziun, uschia Christian Kaspar.