Il LIT, sco la chasa da litteratura vegn numnada, duai daventar in lieu d’inscunter per tuttas e tuts e quai en tut las trais linguas uffizialas dal Grischun. Quai saja ina finamira fitg ambiziunada, uschia la manadra dal LIT Martina Mutzner en il discurs cun SRF. Perquai na vulan las iniziantas ed iniziants dal LIT betg mo esser preschents a Cuira. Ina finamira saja era dad ir en las differentas valadas dal Grischun nua che las differentas linguas vegnan era discurridas. Be uschia pon ins era viver quella trilinguitad. Pia, ina chasa da litteratura – en in tschert senn – mobila.
Er en il chantun Grischun exista in tschert «Röstigraben» e perquai vulain nus crear inscunters per ch'insatge nov po nascher.
Unir, crear e raquintar
La chasa da litteratura dal Grischun duai era esser in lieu nua che bunas istorgias duessan vegnidas creadas, raquintadas ed era udidas – ed exact uschia in lieu dovri a Cuira, manegia Martina Mutzner. Era vegni a dar differentas furmas da represchentaziun. Davent da prelecziuns classicas enfin era tar uschenumnadas «performance» nua che litteratura vegn cumbinada cun musica ubain art. Il pli grond giavisch da Martina Mutzner, manadra da la chasa da litteratura, è che la glieud saja mirvegliusa e ristga da tschentar la dumonda: «Tge è insumma litteratura?»
L’emprima chasa da litteratura dal Grischun cumenza ses program mesemna ils 21-08 a las 19:00 cun ina represchentaziun da lirica grischuna cun il num «A TE». L’entrada è gratuita.