La Viafier retica po empustar 20 ulteriurs trens d'autotracziun dal tip Capricorn tar il constructur da trens svizzer Stadler Rail. Il chantun Grischun sco possessur principal da la RhB e la Confederaziun han dà glisch verda per la fatschenta da 173 milliuns francs. Gia il 2016 aveva la Viafier retica empustà 36 da quels trens tar Stadler Rail. Cun ils trens Capricorn vegnia modernisada la flotta da la RhB ed uschia adattada als basegns dals clients d'ozendi, scriva la Viafier retica en ina communicaziun.
Fundaziun da societad d'immobiglias
En pli ha la viafier survegnì la lubientscha da fundar la RhB Immobilien AG sco societad affiliada da la Viafier retica. La Viafier retica sparta cun quest pass la fatschenta principala subvenziunada da la fatschenta cun atgna rentabilitad. La nova societad vegn ad administrar enturn 30 immobiglias ed er tants contracts da dretg da construcziun cun ina valita da var 45 milliuns francs. I sa tracta qua dad immobiglias che n'èn betg essenzialas per la gestiun da la viafier.
Per las immobiglias d'infrastructura e da producziun da la RhB sco staziuns da tren u lavuratoris, resta vinavant la partiziun d'immobiglias da la Retica responsabla.
