Siglir tar il cuntegn

Grischun Nova basa duai facilitar las lavurs sin las vias dal Puschlav

En il Puschlav èn la mesemna vegnidas inauguradas la nova basa per il mantegniment da las vias e la halla da controlla per l'Uffizi da traffic. Il stabiliment correspunda a las pretensiuns actualas.

Nova basa en il Puschlav
Legenda: Tut sut in tetg e contemporan. MAD

Quai è in project da l'Uffizi da construcziun bassa dal district 3 dal Grischun. L'uffizi è responsabel per il mantegniment da la rait da las vias chantunalas en la Val Puschlav.

Correspunder a las pretensiuns actualas

La nova basa ha l'uffizi stgaffì perquai che la basa existenta en la zona d'abitar Prada na correspunda betg a las pretensiuns actualas: areguard la grondezza, la realisaziun architectonica e l'equipament tecnic. Ultra da quai è sia utilisaziun restrenschida gia oz fermamain pervia da l''access limità da maximalmain 18 tonnas.

Tut sut in tetg

In terren adattà per construir la nova basa han ins chattà en il territori Li Curt. La halla da controlla, la halla da parcar per ils vehichels, las localitads da deposit sco er ils locals da segiurn e la gardaroba per ils collavuraturs èn unids sut in tetg. In deposit al liber ed in implant da silo per 250 meters cubic sal e per 125 meters cubic crappella sco er in implant da silo cun in volumen da 20'000 liters aua da sal cumpletteschan la purschida.