L'Uniun Valposchiavo Turismo survegn sustegn finanzial dal chantun e da la Confederaziun. Per ses project da rinforzar las structuras d'alloschament datti 490'000 francs. Da la contribuziun che stat en il rom da la nova politica regiunala da la Confederaziun (NPR) surpiglia il chantun ina mesadad e la Confederaziun l'autra, scriva la regenza grischuna en ina communicaziun.
La Val Puschlav tutga tar ina da las pli pitschnas destinaziuns turisticas grischunas – betg be tenor surfatscha ma er tar il dumber da pernottaziuns. Ils ultims onns ha il turissem en la Val Puschlav però survegnì pli e pli schlantsch. 2021 ha la val survegnì sco ina da 44 destinaziuns il label «Best Tourism Villages» da l'organisaziun mundiala da turissem.