Plaunet prenda l'idea dad ina chasa da parturir a Cuira furma. Schegea che quella exista per il mument anc sin palpiri, l’engaschament da las iniziantas è grond. Impurtant da menziunar: Quella nova chasa da parturir duess vegnir renconuschida da la cassa da malsauns. In novum en il chantun Grischun.
Per nus èsi impurtant che mintga dunna ha la schelta da pudair nescher ses uffant là nua che ella vul. Sche quai è en in ospital ubain en ina chasa da parturir n'emporta betg. Impurtant è la schelta.
Quella schelta manca per il mument en noss chantun. Ed ella para da vegnir adina pli e pli pitschna. Uschia ha per exempel avant in per mais l'ospital a Tusaun stuì serrar las portas da lur partiziun da parturir ord motivs finanzials. Ad auters ospitals regiunals en il Grischun smanatscha in privel sumegliant. Betg mo, mabain era pervia da quella miseria finanziala dals ospitals regiunals, vesan las trais iniziantas dal nov project – la chasa da parturir a Cuira – ina schanza.
Sfidas datti anc inqualas da surmuntar
En Svizra datti radund 20 chasas da parturir ch’èn renconuschidas da la cassa da malsauns. En il Grischun datti fin ussa naginas. A Vaz sut (Untervaz) datti ina chasa da parturir privata. La cassa da malsauns na surpiglia là betg tut las prestaziuns. Uschia ch’ins sto pajar sez per la tgira suenter la naschientscha. Perquai n'è quella chasa da parturir betg sin quella uschenumnada «glista d'ospital».
Per vegnir sin quella glista d'ospital ston tscherts criteris esser ademplids. Per exempel la distanza tar in ospital dal center cun ina partiziun da parturir ed ina neonatologia. Per Angelica Signer è sias collegas èsi impurtant che lur chasa da parturir vegn sin quella glista d'ospital ed uschia era renconuschida da la cassa da malsauns.
Cun esser sin quella glista d'ospital vegnan tut las purschidas surpigliadas da l’assicuranza da basa. Quai pussibilitescha a tut las dunnas, n'emporta betg da tge cultura ubain tge polster finanzial che stat a disposiziun, da pudair parturir en questa chasa.
Sper quella glista d'ospital è era la permissiun da manaschi essenziala. Per survegnir lezza dovran ellas contracts da cooperativa cun l'ospital Fontana. Qua sajan ellas ussa londervi. In’auter punct central è natiralmain l’entira finanziaziun. Quella duess, sper sustegn da sponsurs, era vegnir purtada dad in uniun da promoturs. Era quai in punct nua ch'i vala ussa: dar gas. Tut en tut stoppian ellas rimnar minimum 500'000 francs capital d'entschatta.
Nus duvrain in capital d’entschatta. Suenter trais onns vegn la chasa da parturir da purtar sasez.
Ir en ina chasa da parturir: è la dumonda insumma qua?
Las trais dunnas da part: Angelica Signer, Domenica Diethelm e Sara Coray èn persvasas che la dumonda tar las dunnas fissi qua. Ellas accumpognan gia ussa, cun lur praxis «Hebammen Graubünden» quatter naschientschas da chasa en il mais. Per intginas da quellas dunnas vegniss era la chasa da parturir en dumonda.
Per pudair far gudogn cun il nov project, la chasa da parturir a Cuira, stuessan ellas avair almain 12 naschientschas en il mais. Quai correspunda circa al dumber d’uffants che vegni mintga mais en in ospital regiunal sin il mund, declera Angelica Signer. Cun la situaziun actuala, che l'ospital da Tusaun ha stuì serrar lur partiziun da parturir, vesian ellas potenzial.
Co vinavant?
La chasa da parturir a Cuira exista fin ussa anc sin palpiri. Ins pudess era dir, ella sa chatta en il emprim trimester da la gravidanza. Proxim termin saja da chattar ina abitaziun ubain ina chasa adattada per quest project. Quai saja gnanc uschè simpel. Dus objects hajan ellas ussa en vista e sajan sin buna via. Tuttina, sfidas datti anc inqualas da surmuntar: Finanziaziun, permissiun da manaschi e las tractativas cun l'ospital Fontana èn mo intginas da bleras.
Sche tut giaja tenor plan, lura fiss il termin da naschientscha – da la chasa da parturir a Cuira – la primavaira 2027.
Or da l'archiv: