Siglir tar il cuntegn

Header

audio
Corona: Consequenzas da 2G+ per bogns e wellness
Or da Actualitad dals 22.12.2021.
laschar ir. Durada: 3 minutas 36 Secundas.
cuntegn

Novas reglas 2G+ ed ils bogns

Persunas ch'èn guaridas ubain vaccinadas dovran supplementarmain anc in test cun resultat negativ per pudair entrar en bogns e wellness. Prendì or, sche l'ultim vaccin ubain il booster è pli giuven che 4 mais. Uschia las novas reglas da la Confederaziun.

Bogn ad Andeer cun damain giasts

Addi Van Gent, il manader dal bogn ad Andeer è spanegià, tge che quellas reglas muntan per las emnas tranter Nadal e Bumaun: «Quai è per nus il meglier temp cun las pli autas cifras. Igl è uss dentant grev da dir, quants giasts che vegnan a mancar, dentant segir 25%», suppona el. Gia l'emprim di cun las novas reglas da 2G+ ha quai dà damain giasts. Van Gent quinta: «il medem di avant 2 onns avain nus gì 139 entradas – quella giada be 92. 20 persunas avain nus stuì trametter davent, perquai ch'ellas n'avevan betg in certificat cun test, e da quellas 20 èn be duas propi lura er idas a laschar far anc in test per pudair entrar».

Lieu per testar stuess esser pli datiers

Quai saja er in zic il problem ad Andeer, ch'els n'hajan betg directamain avant il bogn la pussaivladad da testar. Bogn Ragaz per exempel ha ina staziun da testar extra per ils giasts da la terma. Andeer saja dentant pli pitschen e quai na giess betg per raschuns finanzialas e da persunal. Dentant saja pussaivel da collavurar cun ils medis. Uschiglio stuessan persunas che vulan sa laschar testar ir enfin Tusaun en l'apoteca.

Testar gist sper il bogn a Scuol

Il bogn a Scuol ha dapli cletg, quai che pertutga far tests damanaivel. La pratica da medi che fa era tests è gist sper la porta dal bogn. «Per il mument essan nus anc vid elavurar in urari ensemen cun la media», di Claudio Duschletta, il manader dal bogn. Er el quinta cun ina sperdita da giasts tranter Nadal e Bumaun – na gughegia dentant betg da far ina prognosa. El spera ch'almain las vacanzas da sport sajan lura puspè pussaivlas senza in 2G+.

RTR actualitad 11:00

Artitgels legids il pli savens