La dischoccupaziun resta survesaivla en il Grischun. Ina quota dad 1% quest october annunzia l'Uffizi per industria, mastergn e lavur dal chantun Grischun. En tut èn 1'090 persunas senza lavur. Latiers vegnan anc 804 persunas che dovran l'intermediaziun da lavur publica (RAV) per chattar lavur, ma na retschaivan betg sustegn finanzial.
La quota da dischoccupaziun è pli auta ch'il settember. La visualisaziun da datas mussa dentant era che quest augment da las persunas senza lavur capita mintg'onn – pia che quai è tipic l'atun. Las pli bleras persunas senza lavur datti en la branscha da restauraziun (432 persunas). Levet dapli umens che dunnas èn senza lavur.
Naginas midadas sin plaun naziunal
La quota naziunala da dischoccupaziun è 1,9% e cunquai betg creschida cumpareglià cun il settember. La quota è plinavant marcantamain pli bassa che durant la pandemia. L'october 2021 eri anc 27'000 persunas dapli che n'avevan betg lavur (ina sminuziun da 23%).