L'onn da corona 2020 è l'economia creschida sulettamain en ils chantuns Zug e Schaffusa. En tut ils auters chantuns è il product interiur brut (BIP) sa reducì, sco l'Uffizi federal da statistica communitgescha. En l'entira Svizra è il BIP sa reducì per 2,6%.
Economia grischuna sa reducescha sur la media Svizra
La pandemia da Covid-19 ha er gì consequenzas per l'economia grischuna. En il Grischun era la sminuziun pli gronda che la media svizra cun in minus da 3,8%. La pli ferma reducziun hai dà en il chantun Giura cun -8,5%, Neuchatel (-6,5%) e Glaruna (-5.3%). Ils augments a Zug (+1,6%) e Schaffusa (+0,7%) eran bass.
Las branschas ch'han patì il pli fitg l'onn da corona 2020 en Svizra sajan stadas tranter auter l'hotellaria, la gastronomia, la cultura ed il sport. Creschids sajan dentant per exempel ils servetschs da finanzas, d'informatica e la chemia.
L'economia svizra e l'economia grischuna
L'economia grischuna aveva il 2020 in grondezza da circa 14,5 milliardas francs, quai èn circa 2,1% da l'entira economia Svizra. Il Grischun è sin cunquai sin plazza 17 dals chantuns svizzers.
En general è il BIP grischun sa sviluppà sumegliantamain sco il BIP svizzer ils ultims onns. Differenzas datti dentant durant onns da crisa. Uschia è l'economia grischuna sa reducida damain suenter la crisa dal 2008 e 2009.
Il cuntrari è stà il cas suenter il schoc dal franc dal 2015 ed er 2020 cun corona.
Sco corona ha er il schoc dal franc tutgà fermamain il turissem. Quella branscha è ordvart impurtanta per l'economia grischuna. Bundant 30% dals emploiads ed emploiadas grischunas lavuran en il turissem, en tut la Svizra èn quai be 4%.
