Il Grischun ha dà albiert l'onn passà ad uschè bleras turistas e turists sco dapi 15 onns betg pli. Quai cun 5,68 milliuns pernottaziuns. Cumpareglià cun l'onn avant saja quai in plus da 2,8%, communitgescha l'organisaziun da turissem Grischun Vacanzas. Igl è il meglier resultat dapi il 2010 cura ch'il chantun Grischun aveva anc dumbrà 5,8 milliuns pernottaziuns. Cumpareglià cun il 2019, l'onn avant corona, munta l'augment ad 8%.
In record hajan ins era nudà tar l'arrivada dals giasts – quai cun en tut 2,21 milliuns. Gnanc ils onns 1992 e 1993 cura ch'il Grischun aveva nudà 7 milliuns pernottaziuns hai dà tantas arrivadas da giasts. Quai che muntia ch'ils giasts stettian pli pauc ditg che pli baud. En media stettia in giast 2,57 notgs, scriva Grischun Vacanzas.
Engiadina e Tavau Claustra cun bun la mesadad da pernottaziuns
Bun la mesadad da las pernottaziuns èn idas sin il conto da las duas destinaziuns Engiadina San Murezzan e Tavau Claustra. En general hai dà quasi en tut las destinaziuns in augment da pernottaziuns. Per la gronda part u 63% da quellas han procurà ils giasts svizzers. Mintga 5avel da quels è vegnì dal chantun Turitg. Ma era da l'exteriur vegnan adina dapli giasts. Uschia è la dumonda or dals Stadis Unids creschida per passa 17% u quella da l'India per bunamain 31%.
Era las cifras da questa stagiun d'enviern e las prognosas per il 2026 sajan positivas, scriva Grischun Vacanzas vinavant. Ins quinta cun in lev augment.
Stgars 44 milliuns pernottaziuns en l'entira Svizra
La hotellaria svizra ha registrà l'onn passà in nov record cun 43,9 milliuns pernottaziuns. Cunquai surpassa la branscha las cifras da l'onn avant per 2,6%. Quai mussan las novas cifras da l'Uffizi federal da statistica. Gia la fin da schaner aveva quel signalisà che l'hotellaria haja cuntanschì in nov livel.
Contribuì a questas cifras da record han tant ils giasts naziunals sco er internaziunals. 21 milliuns pernottaziuns èn idas sin il conto da persunas svizras. Surtut viadis en citads èn stads dumandads. Quels en regiuns muntagnardas e ruralas percunter èn ids enavos levet.
