Da fertant ch'il toc original gioga en il temp medieval, gioga l'inscenaziun nova dal reschissur grischun en in ospital en ils onns 1960. Uschia duai l'opera er esser pli datiers dals aspectaturs e da las aspectaturas. Tge ch'è dentant stà tuttina, è la figura principala:
Azucena tutga tar il pievel viagiant e less per tut pretsch prender vendetga per quai ch'è vegnì fatg a sia mamma.
La mamma d'Azucena è numnadamain vegnida brischada en il toc original. Per intgins è ella ina guaridra, per ils auters dentant ina stria.
Medischina classica e medischina alternativa
La vendetga d'Azucena sa mussa lura uschia ch'ella engola l'uffant dal cont e metta qual en il fieu. Ses grond sbagl: ella bitta il faus uffant en il fieu – numnadamain ses agen. Silsuenter tira ella dentant si l'uffant dal cont sco ses agen figl. En l'inscenaziun nova dad Andrea Zogg na vegn nagin brischà, dentant tematisescha il reschissur il conflict tranter la medischina classica che vegn represchentada da l'ospital e la medischina alternativa che vegn pratitgada d'Azucena.
Varga 40 persunas sin tribuna
Sin tribuna ch'è amez las paraids alvas da crap dal chasti da Haldenstein, chantan var 40 persunas – ils solists e las solistas professiunalas ed il chor. La filarmonia da chombra grischuna cun lur musicistas e musicists han lur plaz in zic en il zuppà sut la tribuna. Per inscenar l’ospital han els survegnì requisits originals sco letgs, plimatschs e schizunt apparats da respiraziun da l'Ospital chantunal e da l’Ospital da la crusch.
Il chasti da Haldenstein è il lieu perfetg per questa opera. Las paraids e las pitschnas fanestras dattan bunamain in sentiment claustrofobic.
E tranter las paraids dal chasti da Haldenstein vegn la fin finala era decidì il cumbat tranter l'uffant che Azucena tira si sco ses agen, e ses frar. Els na san dentant enfin la fin betg ch'els èn fragliuns. Era sche l'opera originala da Giuseppe Verdi gioga en il 15avel tschientaner, saja il «cumbat tranter frars» er oz anc fitg actual. Tranter auter era pervia da la situaziun da corona u la guerra tranter l'Ucraina e la Russia.