Tranter ils 3 ed ils 27 d'avust 2022 preschenta l'opera en la curt dal chastè da Haldenstein «il trovatore» da Giuseppe Verdi. In toc plain sfidas. Per exempel saja il cuntegn fitg cumplex e grev da mussar. Dentant perquai che la musica saja uschè bella, sajan ils organisaturs tuttina sa decidids per il toc or da l'onn 1853: «Quai è opera taliana sin ses punct culminant, il timing è perfetg e las rollas èn caracteristicas», di il dirigent da la Kammerphilharmonie dal Grischun Philippe Bach. Cunquai ch'igl è ina capodovra, han els er engaschà capo-chantadurs e chantaduras. Il star en la rolla principala è la chantadura cun ragisch indigenas Maria Riccarda Wesseling, ella gioga la zagrendra Azucena.
Dentant betg per las rollas principalas saja l'opera in deletg da chantar, mabain er per il chor. En quel pon er persunas da la regiun chantar cun. A partir da la fin da l'onn pon ins s'annunziar.
Inscenaziun è ina sfida
Entant che la musica saja insatge tut aparti è il cuntegn da l'opera fitg cumplex. Il reschissur Andrea Zogg ha dentant gia in'idea, co el less dumagnar la sfida. Tradir less el anc nagut, be tant: «I vegn ad avair da far insatge cun ozendi, cun insatge fitg concret che nus tuts patin sutlunder».
Planisadas èn 10 producziuns e tuttas vegnan ad avair lieu en la curt idillica dal chastè. Ils ultims onns han ils organisaturs numnadamain magari stuì dischlocar la producziun en il teater a Cuira pervì da la plievgia ch'ils instruments da l'orchester na verteschan betg. Quest onn è quai problem schlià, l'orchester vegn a seser sut in tetg.